Shillong, K’lyngkot, 24: Ka Maitshaphrang Movement Movement ha ka sngi Baar ka la pynbna paidbah ba kan pynlong ïa ka jingïakob ban shna ïa ka jingrwai ban pynïatylli ïa ka jaidbynriew Hynñiewtrep na ki paidbah nongshong shnong ka Bri u Hynñiewtrep.
Ka jingïakob kan kut haduh u bnai Lber, mynta u snem, ong u Convenor ka Maitshaphrang Movement Bah Michael Syiem ha ka jingïakren bad ki lad pathai khubor.
U la ïathuh ba ki nongïashim bynta ki dei ban pynrung ha kane ka jingrwai ïa ki ktien shnong khynriam, pnar, bhoi, war, maram, lyngngam. “Kin sa don ki nongbishar kiba kynsai ki ban sa bishar ïa ki kyntien bad ïa ka sur jingrwai. Ka khusnam na ka bynta ka jingrwai kaba kit jingmut ïa ka jingïatylli jong ka jaidbynriew Hynñiewtrep kan ïoh khur ïa ka song pisa kaba T.30 hajar bad kaba lah ban pynkiew shuh shuh lada ka Maitshaphrang ka ïoh jingïarap pisa,” la ong u Bah Michael.
“Kum ka jaitbynriew ngi long kiba donbok ban don ïa ka ktien Sohra kaba dei ka ktien kaba pynïasngewthuh lem ïwei ïa iwei bad kum ka jaitbynriew kaba la shah ker kut ha ki heh paid suda bad kum ka jaitbynriew kaba tang shitroh, ka long kaba donkam ban pynïatylli kum ka jaitbynriew,” u la ong.
“Ka long kaba sngewsih ba katba dang mih ki sngi ki don ki jingpyrshang ban pynpait ïa ka jaitbynriew la ka long ki bor kiba nabar ne ki bor kiba napoh. Ka long pat kaba donkam ban wanrah ïa ki lad ki lynti kumno ban pynïatylli ïa ka jaitbynriew,” u la ong.
Ha kaba ïadei bad ka jingrwai ieid ri ne ka State Anthem ba la pyllait dang shen da ka Sorkar Jylla ha ka jingdap 52 snem ka jingïoh jylla bapura jong ka Meghalaya ha kaba la sakhi ba ka la mih ka jingbym sngewtynnad na ki katto katne ki kynhun bad ki seng kiba la pynpaw ka jingsngewsih halor ka jingbym kynthup ïa ka ktien Pnar hapoh kane ka jingrwai ieid ri bad na ka liang u Bah Michael u la ong ba kine ki dak ki shin kiba pynpaw ïa ka jingbym ïatylli.
