Lum u DC South West ïa ki nongot doh ban ïashai halor ka jingpang at ki masi, shah ktah 63 Shnong

Mawkyrwat, Jylliew 02: Hadien ka jingjia ha kine ki kyndiat sngi ba don ki dak ki shin jong ka jingpang ha ki mrad kum ki masi bad ki sniang, u bah T. Lyngwa, IAS, Deputy Commissioner, South West Khasi Hills District, Mawkyrwat mynta ka sngi ka 2 tarik u Jylliew, 2023 u la khot hapoh ka kamra treikam jong u, ïa ki kynhun jong ki nongotdoh masi bad nongotdoh sniang kiba hapoh ka ïew Mawkyrwat bad kynthup ruh ïa ki doktor napoh Animal Veterinary & Husbandry, South West Khasi Hills District, Mawkyrwat.
Hadien ka jingïathir jingmut bad jingïapynshai, u bah T. Lyngwa, IAS, Deputy Commissioner, South West Khasi Hills District, Mawkyrwat u la ong ba ka jingpang ha ki masi ka jur bha, ha kaba ki la don haduh 63 tylli ki shnong jong ka South West Khasi Hills District kiba la don ïa ki masi kiba kem pang ba tip kum ka ‘Lumpy Skin Disease’ bad 5 tylli ki masi ki la ïap bad ka jingpang ha ki sniang la tip kum ka ‘Fever’ – ka jingpang ba ju mih bad don barabor, hynrei u la ong ba kane ka jingpang kam don jingktah ne bit ei ei ïa ki briew, “lada ki bam ïa ka doh jong ka masi kumjuh ruh ïa ka doh jong ka sniang kam lei lei hynrei kim dei pat ban bam ne otdoh ïa ki masi bad ki sniang kiba la kem pang”.
Shuh shuh u la pynshai ruh ba kane ka jingpang ha ki masi ka lah ban pur bad ïa bit ha ki para masi hi bad lada kin sumar noh bad ai dawai noh tang hadien 3 taïew ki lah ban ïoh jingkhiah namar ki dawai mynta ki lah don bad ïa ki masi ki bym pat kem pang la bthah ïa ka tnad ophis ba dei peit ïa ki mrad ne ka Animal Veterinary & Husbandry ba kin pynbiang da kaba ai tika noh.
Namarkata, u bah T. Lyngwa, IAS, Deputy Commissioner, South West Khasi Hills District, Mawkyrwat u la kyntu ïa ki nongdie doh masi bad nongdie doh sniang ba ki dei ban otdoh beit tang ïa ki masi bad ki sniang ki bym don jingpang. U la ong ruh ba ka la don ruh ki jingbthah na ka sorkar ïa ki nongdie doh ba kim dei shuh ban dang wah pathar ïa ka doh ba la dep ot ha khmat ki dukan namar ka pynlong ka jing-i-sait met ïa ki briew hynrei ki dei ban buh ha ka rukom kaba itynnad bad ba ikhuid khnang ban lait na ka jingwan dem ki skaiñ.
Kumta ban lait na kine kiei kiei, u Deputy Commissioner, South West Khasi Hills District, Mawkyrwat u la khot ïa ki paidbah ba kin don ka jingïatreilang ha ki bynta baroh khnang ba kin jop ïa kine ki jingsniew.