Pyllait paidbah u Bah Kyrmen Shylla ia ka District Nasha Mukt Bharat Abhiyaan Campaign ha EJHD

Lada phi jied ïa u drok, phi jied ïa ka jingiap: Addl SP Banraplang

0

Khliehriat, Jylliew 2 : Ka ophis jong ka District Social welfare, East Jaiñtia Hills District, mynta ka sngi ka la pynlong ia ka prokram ba kyrpang ha Ladrymbai Dongwah, ha kaba u Myntri ka sorkar jylla, u bah Kyrmen Shylla, kum u Kongsan, u la wan ban plie paidbah ïa paidbah ïa kane ka Campaign, ka prokram kaba iadei bad ka jingialap paidbah shaphang ka jingshyrkhei u drok ka ‘Nasha Mukt Bharat Abhiyaan Campaign’, kane ka Campaign ka dei kaba la pynbna da ka sorkar pdeng.
U Additional Superintendent of Police, East Jaiñtia Hills District, u bah Banraplang Jyrwa, MPS, haba kren ha ka jingialang u la kyntu jur ïa ki khynnah bad ïa baroh ba ki dei ban kiar na u drok bad ong ruh “Lada phi jied ïa u drok, phi jied ïa ka jingiap”, u la ong ruh ba ka tnat pulit kan iai shim khia ban khanglad ïa ka jingwan ki drok bad lada lap iano iano kiba wanrah drok ki pulit kin kem beit “Kane ka ktah ïa ka lawei jong ki khynnah, ma ngi ki pilit ngin ieng beit sha khmat, tangba tang ma ngi ngin nym lah ban iakhun pyrshah ïa u drok, hynrei ngi donkam ka jingiatreilang jong baroh”, u la kyntu ruh ïa ki khynnah skul bad baroh ki samla kiba dang pule, ba ki dei ban pyn leit jingmut beit tang ha ki jingpule bad kyntu ruh ïa baroh ki nongshong shnong ba lada ki iohi ïa kino kino ki briew kiba wan thymmai, ki bym ithuh kiba na kiwei pat ki jaka kiba wanrah ïa kino kino ki jait jingbam ba kham pher ba ki dei ban pyntip beit sha ki pulit, u la pynpaw ka jingangnud ba ka imlang ka sahlang ha East Jaiñtia Hills District ka dei ban long kaba lait na u drok, “Namar bun bha ki khynnah kiba naduh 15 haduh 20 snem kyrta kiba la ngat ha u drok bad ka dei ka kamram jong ngi ba ngin wad ban ban iarap ba ki khynnah ki dei ban lait na ka jingpang jingshitom bad na ka jingshyrkhei u drok”
U bah Kyrmen Shylla, u la ai nuksa da ki jingiathuh khana kiba la jia kiba na ka daw u drok bad u kyntu ia ki khynnah bad ki samla ba ki dei ban kiar na u drok bad ban ong ‘Em’ ïa u drok, u ai mynsiem ïa ki khynnah ba ki dei ban long kiba iohi jngai bad ruh ban long kiba skhem jingmut, u la pynshlur bad ai mynsiem ïa uwei na ki khun samla jing ka district uba la im mynta ka jingim ba thymmai ba um dei ban sngew pher bad um dei ban lehraiñ ban ialap ïa kiwei ruh shaphang ka jingshyrkhei u drok, ba lyngba jong u kan long ka jingpynshai ïa kiwei ruh ba kin lait na u drok.
U la ong ruh ba ka jingwan u drok hapoh ka district ka dei namar ba kane ka thaiñ ka dei ka lynti ba iaid lyngba na kata ka daw ka pynlong ïa ki khynnah ba kin ngop, u la ong ruh ba ka jingdon ki pulit ka iarap shibun, ka long ka jingiada ïa ka imlang ka sahlang u kyntu ïa ki longkmie ki longkpa, ki khun samla ban don ka jingiatreilang, kumjuh ruh ki waheh shnong, u la kren kyllum lang ruh ruh ïa baroh ban long kiba phikir bha ban iada ïa ka thain kumjuh ruh ïa ka khyndew ka shyiap ban nym ailad ïa ki briew kiba na bar.
U bah Kyrmen u ai khubkei ïa u Deputy Commissioner, kumjuh ruh ïa ka tnat pulit, ia ki wahehshnog, ïa ki longkmie longkpa, ki khun samla ki khynnah skul kiba la ïa wan lang sha kane ka prokram.
U DeputyCommissioner, Abhilash Banarwal, IAS, u la ai mynsiem ïa ki khynnah ba ki dei ban long kiba khlaiñ ban ieng skhem ban lait na u drok, u la ong ruh ba u drok um lah ban iarap ïa kito kiba don ha ki jingeh bad u drok um dei ka lynti ban pyllait na ki jingeh, jingkhuslai mynsiem, u la pynpaw ka jinsgngew khia ba ka jylla Meghalaya ka la shah ktah haduh katta katta ha u drok, u la ai khublei ïa ka tnat pulit kaba la shim khia ban iakhun pyrshah ïa u drok, u kyntu ïa baroh ki nongshnong shnong ba kin ai ka jingiatreilang ban iakhun pyrshah ïa u drok bad ong ruh “Nga khmih lynti ba kane ka prokram kan wanrah ïa ka jingkylla ha ka imlang ka sahlang”, ha kajuh ka por, u la ai ka jingkhublei kyrpang ïa ka tnat pulit kaba ju shim khia ha kaba iakhun pyrshah ïa u drok bad kaba ïakhun ruh ban wanrah ïa ka imlang ka sahlang kaba lait na u drok.
Ha kane ka sngi, la pynkup burom ruh ïa ka kynhun jong ki pulit, ka Anti Narcotics Task Force (ANTF) jong ka East Jaiñtia Hills District, ha kaba u Deputy Commissioner u la aiti ïa la Momento ha u Additional Superintendent of Police bad la pynkup burom ruh ïa u wei u samla uba napoh ka District, uba la lait mynta na ka jingshyrkhei u drok, uba la wanphai biang pat sha ka jingim kaba thymmai, une u samla u la sdang ban ngop ha u drok naduh ba u dang don 14 snem kyrta bad u la dih ïa u drok haduh ka kyrta kaba 20 snem tam bad mynta u la jop bad lah ban lah ban iehnoh bad wanphai biang pat sha ka jingim ba laitluid bad ba kmen, u bah Kyrmen Shylla u la aiti ïa ka momento sha une u samla.
Kum shibynta jong kane ka prokram, la sakhi ruh ba ka kynhun jong ki nongñiah motor bike kiba na ka shnong Tuber ba la tip kum ka ‘Tuber Biker’s and Tour Association’ ki la ïa wan ban ïa shim bynta lang ha kane ka sngi bad ki la mih ruh da ki bike naduh Ladrymbai, na ophis u Deputy Commissioner shaduh Byndihati ban pynbna paidbah ïa kane ka prokram ba kyrpang kaba ïadei bad ka jingshyrkhei u drok, ïa kane ka kynhun la lam khmat da u President u bah Bida Kyndait bad u Secretary u bah Heimonme Phawa.
Ha kane ka prokram, la pynithuh ruh ïa ki shiphew ngut ki shiphai kiba la jied kyrpang, kiba la don ka jingtbit ba biang, ki ban iakhun pyrshah ïa u drok ha East Jaiñtia Hills District, kine ki dei kita ki Master Volunteer, kiba la jied na ki ar tylli ki NGO, na ka Chankylliang Society bad ka MACWA, ki ban pyntyllun ïa ki campaign ba ka imlang ka sahlang kan lait na u drok.
Kiba la ai jingkren ki kynthup ruh, ka District Social welfare Officer, ka kong R.Pasah, u Waheh Deibormi Suchiang bad kiwei kiwei, ïa ka jingialang la pyniaid da i Kong Renibeth Patlong.

Leave A Reply

Your email address will not be published.