Lum ka ophis ka DSWO Ri Bhoi ïa ki ba don jingduna dkhot met ha Patharkhmah

Nongpoh, Risaw 11: Ban lum ban lang ïa kito ki ba don ka jingduna ha ka dkhot met ba hap hapoh ka Jirang Block, ka ophis ka District Social Welfare Officer Ri Bhoi ha ka 7 tarik u Risaw ka la pynlong da ka jingïakynduh lang kito kiba don ka jingduna ha ki dkhot met na ki shnong kiba hap hapoh ka Jirang Block ha Ri Bhoi District.
Ïa kane ka jingïakynduh lang la pynlong ha ka shnong Patharkhmah ha kaba la wan shim bynta na kylleng ki shnong jong ka Jirang Block na ka bynta ban jied ne bishar bniah ïa kito kiba don ka jingduna ha ka dkhot met khang ba kin ioh ïa ka jingithuh da ka sorkar na ka bynta ban ioh ïa ki lad jingïarap kumba la mang da ka sorkar.
Ha kane ka jingïakynduh lang (Assessment camp) la don lang ruh naduh u MLA ka Jirang, u Bah Sosthnes Sohtun, bad la don ryngkat ruh ka Kong E.Kharshandy, District Social Welfare Officer ka Ri Bhoi, Dr Sutnga, Orthopaedic, Dr. X Marak, ENT bad kiwei kiwei nalor kito ki khynnah ba don jingduna haka dkhot met.
Ïa kane ka jingïakynduh lang kiba don jingduna ha ka dkot met la kyrshan da ka State Resource Centre for Disability Affairs, (SRCDA) Civil Hospital Shillong
Ka jingthmu ba la pynlong ïa kane ka jingïakynduh lang kiba duna dkhot met ka long ban ioh ïa ka jingbishar bniah halor ka bynta ba ki long kita kiba duna dkhot met bad ban ioh rung ha katei ka kyndan kiba duna dkhot met la bishar bniah bha da ka Trained Community-Based Rehabilitation Worker (CBRW) 27 ngut la ioh ban pynrung kyrteng ha ka bhah kito kiba don jingduna ha ka kdhot met hadien ba la bishar bniah ïa ki bad lyngba jong kane ka sngi la ioh ruh ban pynrung kyteng ban ioh ïa u Aadhar Number.