Rah ka Harlibagan FC ïaka Independence Cup 2022 ka TMC Meghalaya ha Byrnihat

Nongpoh, Risaw 11: Ka Harlibagan FC kala long ka lahduh haka lympung ïalehkai phutbol Independence Cup bala pynlong da ka All India Trinamool Congress Jirang Block hadien ba kala lah ban pynliem ïaka MMYC haka jingïakhun phainal kaba la long mynta ka sngi ha madan ïalehkai ka shnong Harlibagan.
Hakane ka sngi la wan ban pynhap pyrda ïa kane ka lympung ïalehkai da u James. S. Lyngdoh State Vice President ka TMC, Sunmoon Marak kyrtong jong ka TMC na Jirang Constituency, Bah Khrawbok Mannar Youth President ka Jirang Block bad ki wei ki riew Rangbah bad ki long kmie jong ka party.
Haba phai sha ka jing ïakhun phainal ha katei ka sngi hapdeng ka Harlibagan FC pyrshah ïaka MMYC, ka jingïakhun kala long kaba itynnad bad shongshit bha, hynrei hapdeng ka jingïakhun bajur bad ka jingtbit jong ki rangïalehkai ka Harlibagan kala lah ban pynliem noh ïaka MMYC da 2-0 kol lyngba u Amos Lapang bad haduh ba kut ka kylla miet ka MMYC kam shym la lah shuh ban pynphai ïa katei ka shi kol kaba la biang pura syndon ïaka Harlibagan FC ban rah ïaka nam lahduh jong katei ka lympung.
La sam ruh ïaki khusnam ha katei ka sngi ha kaba ka Harlibagan FC kaba dei ka nongjop kala ioh ban khur ïaka song pisa kaba 30 hajar lem bad ka trophy katba ka kynhun MMYC kala ioh ban khur ïaka song pisa kaba 15 hajar lem bad ka trophy, la sam ruh ïaki khusnam shimet ba kynthup ïaka nam Best Goal Keeper bala ioh da u Wanpyndap Lapang na Harlibagan FC, Best Player bala ioh da u December Khongjoh naka Umtyrnga FC bad ka Best Discipline Team la ioh da ka Harlibagan FC.