Lum jingïalang ka sorkar halor ka jingeh kaba mih na ka jingjyllei u drok ha ka jylla

By Mawphor Editor On Dec 10, 2024

Shillong, Nohprah 09: Ka Anti-Narcotics Task Force, Meghalaya, ka la pynlong ïa ka jingïalang hynne ka sngi hapoh ka jingïalam jong u Myntri Rangbah u Conrad K Sangma ban ïasyllok halor ka Road Map na ka bynta ban pynduh jait ïa u drok hapoh ka jylla.
Ha kane ka jingïalang la donlang u Symbud Myntri Rangbah ka jylla u Bah Prestone Tynsong, ka Myntri ka ka Health & Family Welfare, ka Dr M Ampareen Lyngdoh, u Myntri ka tnat pule puthi u Rakkam Sangma, u Myntri ka tnat Social Welfare, u Bah Paul Lyngdoh bad DG, Meghalaya, ka Idashisha Nongrang nalor kiwei kiwei ki heh ophisar jong ka jylla.
Ha kane ka jingïalang la ïasyllok halor ki mat kiba bun kiba ïadei bad ka tnat kaba peit ïa ka aiñ, nangta ka tnat pulit, ka tnat ka Koit ka Khiah bad kumjuh ruh da ka tnat Social Welfare. Ha ka jingïalang la ïakren ruh halor ki jingdonkam ban pynkylla ïa ki rukom treikam jong ka ANTF bad ki jingdonkam ki lad ai jingïarap na kiba bun ki tnat sorkar ba kynthup ïa ka tnat Law, Health, Education bad ka Social Welfare.
Haba kren ha ka jingïalang u Myntri rangbah u la ong ba kane ka dei ka jingïalang kaba kongsan ha kaba ka ANTF ka donkam ban shong bad baroh ki tnat kiba donkam ban pyntreikam ïa kiba bun ki kam lyngba ki bynta bapher bapher ha kaba ïadei bad kane ka bynta.
“Ka jingtreikam jong ka ANTF ka long kaba ïar bad kaba donkam ban pyntreikam ïa ki mat ba kongsan kiba dei ruh ki pilot project na ka bynta ban rat dyngkhong ïa u drok ha ka jylla,” u la ong.
U la ong ruh ba kane ka dei ka bynta kaba kongsan bay m dei ban ailad ïa ka jingpyndonkam ïa u drok ha ka jylla kaba la sdang ban suhthied bha ha kine ki sngi.
“Haba ong ba kadei ka bynta kaba ym dei ban ailad da ka tnat Law ha kaba ïadei bad ka jingsam bad pynpoi ïa u drok ha ka jylla, donkam ruh ban don ka jingkhmih ha kaba ïadei bad ka jinglong ha ka imlang sahlang ha kaba ïadei bad kine kiba ju pyndonkam, ki jingsumar ïa ki, nangta ïa ka koit ka khiah kaba long kaba donkam bha hapoh ka imlang sahlang bad ka jingdon ka bynta kaba kongsan da ka tnat ka Koit ka Khiah bad ka tnat Social Welfare halor kane ka kam.” U la banjur ruh ha ka jingdon bynta jong ka tnat pule puthi ban ai ki jingpynsngewthuh ha kaba ïadei bad ka jingïakhun pyrshah ïa ka jingpyndonkam ïa u drok.
Ha ka jingïalang la ïasyllok ruh halor ki jaka khmih bniah bad ki jaka sumar bad kumjuh ruh ki rukom treikam ban pynkut ïa kane ka jingwan poi jong u drok ha ka jylla.