Nongstoiñ, Jylliew, 25: Ka WKSU seng kmie ka la leit ban ïakynduh ïa u Deputy Commissioner jong ka West Khasi Hills ha kaba ïadei bad ki mat jong ka roi ka par, ki kam sahteng ha ka District, kynthup ïa ka Polytechnic, ITI, District Jail ka District Library bad Auditorium ka building ba thymmai jong Sibsing Memorial Govt skul, ka MCH bad kiwei.
Ha kaba ïa dei bad kitei ki mat jingdawa, ka seng ka la pynkynmaw ïa u khlieh nongsynshar jong ka District ba un ïai budien ïa kitei ki mat kiba sahteng la slem bah, kiba dei ki mat na ka bynta ki jingmyntoi jong ki paidbah khamtam ïa ki samla pule jong ka thaiñ.
Ha ka jingïakren bad u DC Nongstoiñ, u la pynpaw ba na ka liang jong u, u la shimkhia ban thoh sha ki bor ba halor ban pynstet bad pynurlong ïa kitei ki mat kiba long ka jingmyntoi u paidbah jong ka thaiñ. U la ong ruh na ka liang jong u, u khlem shong kli kti da kaba u la khot na ka por sha ka por ïa ki ophisar kiba dei peit ha ki tnad trei kam, ban peit ba ki mat ka roi ka par ha la ki jong ki tnad treikam, ba kim dei ban sahteng hynrei ki dei ban trei kam shait shait.
Na ka liang ka seng kan sa nang budien ïa kitei ki mat jingdawa ym tang na u DC jong ka thaiñ hynrei kan sah rah haduh ki bor ba halor jong ki tnad ba ha khlieh duh jong ka jylla khnang ba kin lah ban pynbiang ne mang ban pynurlong khlem ki jingpyn sah teng ïa ka roi ka par sha ka thaiñ West Khasi Hills, ong u samla D. Sun president WKSU seng kmie.
