Nongstoiñ, K’lyngkot 23: Ka jingwanphai pat jong ki nongïalam barim ryngkat ki paitbah nongkyrshan jong ka HSPDP Nongstoiñ constituency ha kine ki sngi shuwa ka Election MDC, ka pyni ba imat ki paitbah ki dang kynmaw ïa u (L) Maieit Hopingstone Lyngdoh u ba ki la jied ïa u kum u nongmihkhmat haduh ba un da khlad noh.
Ïa kitei ki nongïalam bad ki nongkyrshan barim kiba la wan phai biang sha ka party, la pdiang burom mynta ka sngi ha ka jingïalang kaba la pynlong ha Bishop hall New Nongstoiñ. Ki nongïalam barim kiba la wanphai biang ki long u bah Kwikstar Lyngdoh, bah Markus Marweiñ bad kiwei kiwei ryngkat ki nongkyrshan.
Ha katei ka jingïalang pdiang burom ïa ki la ïadonlang da ka kong Badariti Lyndoh Nonglait kyrtong MDC ka Nongstoiñ, bah Methodius Dkhar MLA ka Mawshynrut, bah Witting Mawsor MLA barim ka Mawshynrut bad kiwei kiwei ki nongïalam jong ka party na ka Nongstoiñ constituency.
Ka jingpynïeng kyrtong MDC jong ka HSPDP ïa ka kong Badariri Lyngdoh Nonglait, kaba dei ka khun pyrsa trai jong u (L) Maieit Hopingstone Lyngdoh, ka la pynkyndit bynriew biang ïa ki nongïalam bad ki nongkyrshan kiba rim kiba la sakma kylleng sawdong ha kine ki snem ba la dep hadien ba u Maieit Hopingstone u la khlad noh.
Na ka liang ka kyrtong ka la kyrkhu kyrdoh bad khublei sha baroh ki nongkyrshan bad kyrmen ruh lyngba ka jingtrei shitom jong ki nongkitkam, yn lah ban wanrah ïa u soh jingjop ha Nongstoiñ.