Sngewkhia ka SAFF ba kynnoh kynshoit niam ka KSP ha ka jingjia ha Mawkynrew

Shillong, K’ Lyngkot 23: Ki dkhot ba pawkhmat jong ka Shillong All Faiths Forum (SAFF) ki la pynpaw ïa ka jingsngewkhia halor ka jingkam bad jingkynnoh jong ka seng Hindu napoh jylla Assam ka Kutumba Surakshya Parishad (KSP) ha kaba iadei bad ka jingjia hapoh ka shnong Mawkynrew kaba la ong ba kane ka jingleh kaba ym lah ban ñaishah haba ïadei bad ka niam bad kumjuh ruh kaba la kynnoh ba kane ka jingjia ka dei kum ka jingjia kynshoit niam.
Ha kaba ïadei bad kane na ka liang ka SAFF ka la pynrem jur ïa kane ka seng kaba la pynmih ïa kine ki kyntien kaba long kum ka jingai ding halor ka jingjia ha Mawkynrew kaba la nang pynshlur shuh shuh ïa ka jingïashrut ha kaba ïadei bad ka nongrim jong ka niam ha kaba kane ka long ka kam kaba ym lah satia ban pdiang. “Kane kadei kajuh ka seng kaba dang shen ka la byrngem ïa ki briew jong ka jylla da ka jingthmu ban pynlong ïa ka jingpakhang surok ha kaba ïadei bad ki kam jngohkai ha kane ka jylla,” ong ka SAFF ha ka kyrwoh khubor.
Ka la ong ba katkum ki lad pathai khubor la ïohi ba ki paidbah kiba la don bynta ha kane ka jingjia ha shnong Mawkynrew khlem da pynithuh satia ba kidei na kano kano ka niam bad kadei kaba bakla ba ka KSP ka la pynmih ïa kane ka jingkynnoh bad kynnoh ruh ba kidei napoh ki kynhun balang Khristan kiba donkti halor kane ka jingjia.
Na ka liang ka SAFF ka kyrpad ïa ki paidbah bad ki nongïalam shnong hapoh ka thaiñ Mawkynrew ba kin ïatreilang bad ki bor jong ka aiñ khnang ba yn lah ban warah ïa ka suk ka saiñ bad ka jingsngew shipara ha kaba ïadei bad kane ka jingjia, ong ka kyrwoh ba la phah da u Bah Noor Nongrum, Vice President ka SAFF.