Leit hi u CM bad ki Deputy CM ban thang ïa u drok ba kot palat 53 klur ha ka pajwa Star Cement

0

Khliehriat, K’Lyngkot 23 : U Myntri rangbah ka jylla, u Conrad K Sangma lem bad ki Symbud Myntri Rangbah ba kynthup ïa u bah Prestone Tyngsong bad u Bah Sñiawbhalang Dhar, nangta ka Myntri ka tnat ka koit ka khiah, Dr. Ampareen Lyngdoh ha ka sngi Palei ki la hiar sha East Jaintia Hills ban leit thang bun tylli bha ki song drok ha ki pajwa ba rhem jong ka Star Cement kaba don ha Lumshnong.
La ïathuh ba ki drok ba thang ha kane ka sngi ki la don bun song bha ki drok ïa kiba la wanrah na ki distrik bapher bapher bad kiba la shong dor palat 53 klur tyngka.
Haba kren sha ki pathai khubor ha conference Room ha Star Cement, u Myntri Rangbah u la ïathuh ba kine ki drok kiba la pynduh pyndam da kaba thang ki dei kiba shong dor haduh palat 53 klur tyngka kiba kynthup haduh 23.98 klur u drok herion, 7.6 klur u ganja, 21.3 klur tyngka u white crystal methamphetamine bad kiwei kiwei ki jait drok.
“Shen kin sa nang don shuh ki drok kiba yn bteng ban ïai thang ban pynduh pyndam ha kine ki bnai ban wan,” u la ong.
U la ong ba na ka liang ka sorkar hi ka shim khia haduh katta katta ha kaba ïadei bad kane ka thma ïakhun pyrshah ïa u drok bad ong ba kane ka jingïakhun kan nang ïai bteng nange shakhmat. Kumta u la kyntu ïa ki nongshong shnong jong ka jylla ba kin ai ka jingïatrei lang kkum ka kynhun.
U Myntri Rangbah u ong ruh ba ka tnat Social welafre, ka tnat ka koit ka khiah bad kiwei kiwei ki tnat ruh ki don ka bynta ba kongsan ban ïa treilang ha kane ka thma ïakhun pyrshah ïa u drok.
Shuh shuh u la ong ba ka rukom thang ïa ki drok ha kane ka pajwa ding kaba rhem bha jong ka Star Cement ka dei kaba paka bha, u la ai khublei ïa ki bor ba pynïaid jong ka company Star Cement kaba la ailad ban pyndep ïa kane ka kam ban pynduh pyndam ïa kine ki drok ha kane ka kharkhana.
“Kane ka dei ruh ka nuksa kaba paw ba ka sorkar jong ngi kumba ka la shimkhia ban ïakhun ïa kane ka thma drok hapoh ka jylla ha kaba ngi la shim ruh ïa ki synjam kiba bun ban ïakhun pyrshah ïa u drok bad ngin nang ïai leh ïa kane ha ki sngi ki ban wan ruh, ngi la thaw ïa ki kynthun ban ïakhun pyrshah ïa ki drok bad ki la bun ki prokram, ki polisi kiba ngi la thaw da ka sorkar ban pyntikna ba kane ka thma pyrshah ïa u drok ka dang ïaid.”
U ong ba ka jingdon jongki ha kane ka sngi hangtei ban pynshisha ba na ka liang ka sorkar ka la shim khia ïa kane ka thma pyrshah ïa u drok bad ki sngew ban ai khublei ïa ka tnat pulit ba kan nang kiew shaphrang kaba la leh ïa ka kam kaba khraw ba la lam khmat da ka DGP bad ki heh pulit kynthup naduh ki SP ki ba peit ha ki district bapher bapher, ki kynhun ANTF bad ki heh sorkar kiba ai jingïatreilang.
U Conrad Sangma, u la ong ruh ba na ka liang ka sorkar kan pynïoh ïa ka rehabilitation na ka bynta kito kiba pyndonkam drok bad ruh ban pynduh pyndam ïa kito kiba wanrah drok shapoh ka jylla.
Na ka liang u Symbud Myntri Rangbah ba dei peit ïa ka tnad Kampohiing ka Jylla, Bah Prestone Tynsong u u la pynpaw ka jingsngew khia halor kane ka jingkynrei u drok bad u kyrpad ïa ki nongshong shnong ka jylla naduh ki nongsynshar shnong, ki nongsynshar hima, ki sengbhalang bapher bapher, ki seng kynthei, ki seng samla shnong ba kin ai ka jingïatreilang bad ka sorkar ba lada ki ïoh kano kano ka jingtip kin sngewbha ban pyntip sha ki police station ne sha ki PO kiba don hajan khnang ban dup lah ban tehlakam ïa kane ka jingsniew kaba i shyrkhei haduh katta katta kaba ktah haduh katta katta ïa ki longiing longsem.
U la ai burom ïa ki tnat pulit jong ki district bapher bapher ba ha kane ka sngi la lah ban thang noh ïa kine ki drok kiba bunjait kiba la ïoh kem ha kine ki khyndiat snem ba la leit.
“Ngi la pyndep ïa kane ka kam ha kaba la thang pynduh pyndam ïa kine ki drok, ym dei ban sngewthuh bakla namar teng teng ki don kiba mih ha ki kotkhubor ba ka ju mih ka jingong ba ngi kylli ïa ki pulit ba shano ki buh ïa ki drok ba ki la dep kem namar mar ïa dep ban kem ne kurup ka aiñ jong ka NDPS Act ka ong da kaba shai kdar ba dei ban phah sha iingbishar bad ngi hap ruh ban buh bha ngim lah ban leh kat katba ngi sngewbit namar ba ngi hap ban pynpoi sha ka iingbishar bad ka don ruh ka don ruh ka committee kaba naduh ki district level committee bad ki high level committee bad ryngkat bad ka jingbthah na iingbishar ïa kine ki drok ban tnang bad pynduh jait bad namar ba ngi la ïoh jingbit na iingbishar ngin sa thang ïa kine ki drok,” u la pynshai.
Nangta u ong ba dang ha u snem 2022 ki la lah ban thang pynduh jait ïa ki drok hynrei namar ba ki dang don kiba dang sahkut ha iingbishar kumta ynda la ai hukum na iingbishar kin sa lah ban thang ïa ki drok.
“Ym dei ba ngi buhrieh, hynrei dei tang na ka daw ba ngi hap ban ïaid ïa ki kyndon bad kane ka shim por” ong u Bah Prestone.
Na ka liang ka DGP, Kong Idashisha Nongrang, IPS, ka la pynshai ba ki drok kiba la thang mynta ka sngi ki long 600 kilo u kynja, palat 3 kilo u herion, crystal methamphetamine, khyndiat u drok opium. Ka la ong ruh ba ïa kane ka kam la leh katkum ki kyndon jong ka NDPS Act.
“Mynta ngi la thang pynduh pyndam ïa ki drok kiba shong dor palat ïa ka 53 klur tyngka bad kine ki drok ki dei kiba ngi la ïoh kurup kiba na ki 56 tylli ki cases kiba na ki district bapher bapher jong ka eastern range,” ka la ong .
Ka ong ruh ba baroh kito ki jingkynnoh kiba mih ki dei ki bym shongnia, namar ba ki dang don shuh shuh ki case drok kiba dang don mynta hapoh iingbishar bad kin sa nang don shuh shuh ki drok kiba yn sa thang kata ynda la ïoh hukum na ka iingbishar.
“Baroh ki OC ki la register ïa ki ejahar sha iingbishar bad na iingbishar kin sa pyllait ïa ka hukum ban pynduh pyndam noh ïa ki,” ka la ong da kaba bynrap ba ka pyntikna ruh ba baroh kito ki drok kiba la kurup ki dei kiba la phah sha iingbishar bad ki dei ki jong ka iingbishar tat haduh ban da la ïoh ka hukum na ka iingbishar yn sa lah ban thang ïa ki.
Ha katei ka sngi la ïa don ryngkat lang ruh ka myntri jong ka tnat ka koit ka khiah ka kong Ampareen Lyngdoh, ka MLA Sutnga Saipung, ka Kong Santa Mary Shylla, u Superintendent of Police, ANTF, Shillong, u Jagpal Sing Dhanoa, IPS, u Superintendent of Police, East Jaiñtia Hills District, u Giri Prasad, IPS, u Local Director ka Star Cement, u bah Emlangki Lamare, u Representative Management ka Star Cement, u Devendar Bansal, u senior manager jong ka Star Cement Lumshnong, u Sidharth Banerjee, ki heh pulit, ki heh sorkar bad kiwei kiwei.
Na ka liang ka ophis u Deputy Commissioner ka East Jaiñtia Hills District bad kumjuh ruh na ka liang ka company Star Cement Lumshnong ki la pynkup burom ïa u Myntri Rangbah, u Conrad Sangma, ïa ki ar ngut ki Symbud Mynri rangbah bad ruh ïa ka MLA Sutnga Saipung.
Ha kane ka sngi ba thang pynduh pyndam ïa kitei ki drok la wan ruh ban sakhi lang da ki kynhun sengbhalang ba kynthup ka Hynñiewtrep Youth Council Central Body ba la lam khmat da u Secretary HYC-CB, u bah Isaac Basaïawmoit, ka Hynñiewtrep Integrated Teritorial Organisation ba la lam khmat da u Prisident HITO East Jaiñtia Hills District, u bah Deibormi Rynbai bad ki la shimbynta lang ruh ha kaba thang ïa ki drok ha ka pajwa ding ba rhem ha Star Cement.

Leave A Reply

Your email address will not be published.