Shillong, Lber 29: Ka seng Hynñiewtrep Achik National Movement hapoh ka jingïalam jong u Assistant General Secretary u Bah Wyraiwai Sohtun bad kiwei ki dkhot ki la leit ban khang tala ïa ka Incom Tax bad ka ophis Custom bad ki la phah ruh ïa baroh ki nongtrei kiba la wan sha kitei ki ophis treikam.
Kane ka jingleit khang jong katei ka sengbhalang ka la long namar kitei ki ophis treikam kim burom ïa ka sngi kyntang ki Khristan ne ka Good Friday kaba ju long manla ka snem ha une u bnai.
Na ka liang ka seng HANM ka la phah mih noh ruh ïa u Joint Commissioner ka Income Tax bad ïa u Chief Account Ophisar ka tnat Custom bad kiwei ki heh ophisar.
Ki nongtrei kitei ki ophis ki la kam ruh ba ka jingphah wan trei kadei ka jingbthah jong ki heh jong ka ophis.
Kumta na ka liang ka seng ka la leit ban khang hi noh ïa kitei ki ophis bad phah mih noh ruh ïa baroh ki nongtrei kiba dang bun kam ban trei la ka kam.
Haba kren bad ki lad pathai khubor na ka liang u Bah Sohtun nongïalam ka HANM u la ong ba hadien ba la ïoh jingtip ba kine ki ophis ki treikam bad khlem burom wat ïa ka jingrakhe jong kiba long Khristan ïa ka Good Friday ki la leit ban pynsangeh ban khang ïa kitei ki jaka treikam.
Nalor kane na ka liang ka seng ka la lap ruh ba ha kine ki ophis treikam ki nongtrei kiba bun dei hi ki bar jylla bad ki khasi ki don tang khyndiat ngut.
