Nongstoiñ, Lber, 29: Ha ka sngi palei, ki nongïalam jong ka All India Trinamool Congress hapoh ka jingïalam jong u Bah Macmillan Kharbani kum u president, ki la leit ban pynïasoh noh ïalade sha ka seng National People Party, hadien ba ki la khylliap lama noh ïa ka TMC ha Nongstoiñ namar ka jingsngewthuh ba ki briew jong ka thaiñ kim pat pdiang satia ïa katei ka seng.
Ki nongïalam ka TMC Nongstoiñ ba kynthup ïa u Bah Macmillan Kharbani, Bah Hubert Kharbani bad Bah Paskal Nongrum, haba ai jingkren ha katei ka sngi ki la pynpaw ba hadien ba ki la rai ban iehnoh noh ïa ka party TMC, ki la pyrkhat shano kin ïaid.
Hadien ba la pyrkhat sani bha, da kawei ka jingmut ki la sngew dei ban pynïasoh noh sha ka party NPP, namar ki la ong ba kane ka party ka don ïa u nongïalam u ba shisha bad hapoh ka jingïalam jong u Bah Macmillan Byrsat ex MLA, kiba bun ki matti kiba u la leh na ka bynta ka dong ka thaiñ bad haduh mynta ki kam kiba u la wanrah ki dang ïaid bad sdang trei shait shait.
Ki la pynpaw ba ka jinglah jong une u MLA barim ka Nongstoiñ ban pyni da ki kam, ka la pynlong ïa ki ban wan pynïasoh noh bad ka NPP. Ki la kular ruh ban ai ka jingïatreilang na ka bynta ban nang pynbha shuh shuh ïa ka dong ka thaiñ nangne shakhmat.
Ha katei ka sngi la pdiang sngewbha ïa kitei ki nongïalam ka party TMC da u Bah Macmillan Byrsat, President ka NPP West Khasi Hills ryngkat ki nongïalam ka NPP Nongstoiñ Block hapoh ka ïing sah jong u kaba don hapoh ka shnong Pyndengrei, Nongstoiñ.
U Bah Macmillan Byrsat haba pdiang burom ïa ki nongïalam ka TMC, u la kyrpad ban ïa klet noh ïa kaei kaba ladep bad nangne shakhmat yn peit kaei kaba donkam ban leh na ka bynta ban kyntiew ïa ka Constituency.
