Ka VPP kam pat dei ka Seng Riewlum, ka dei ka seng kaba ïoh jingkyrshan tang ha East Khasi Hills: Paul
Shillong, Lber 27 : U Nongialam ka United Democratic Party bad Myntri Sorkar jylla U Bah Paul Lyngdoh ula ong ba ka Regional Democratic Alliance (RDA) ka kham don ka lad ban jop na Shillong parliamentary seat ha ka elekshon Lok Sabha ban wan namar ka Congress ka dei ka bym larkam shuh bad ka Voice of the People Party (VPP) ka dei ka party ba kut tang ha kawei ka District kata tang ha East Khasi Hills.
Haba ïakren bad ki nongthoh khubor mynta ka sngi Balang, u Bah Paul ula ong ba ka Shillong constituency ka ju dei ka ktem jong ka Congress hynrei ka saiñ pyrthei ha India kala kylla bak ly bak bad kane kan iarap ia ka party kum ka UDP bad ka kynhun synrop kum ka RDA.
“Kane ka long namar ha kawei ka liang, ka don ka jingbym kwah ïa ka BJP. Ka jingshisha ba ki khlem pynïeng kyrtong na Meghalaya ka pyni ba ki tip ba kam don jingmyntoi ïa ki ban pynïeng kyrtong. Mynta, ka don ka jingbym kwah ïa ka BJP bad ka Congress ka dei ka bym larkam shuh, kumta ki paidbah kin vote shano?” ula ong.
U Bah Paul ula ong ba ka VPP ka dei ka party ba dang mih thymmai ha ka kam saiñ pyrthei bad kam don satia ïa ki ktem hangno hangno ruh lait tang ha East Khasi Hills District ka Meghalaya.
“Napdeng ki 12 tylli ki District ka Meghalaya, kane ka party VPP ka don ki nongmihkhmat tang ha kawei ka District kata hangne ha East Khasi Hills , kumta ym lah ban khot ïa ka kum ka seng riewlum, kam dei ruh ka party ba la pdiang hapoh ka Jylla, ka dei ka party tang jong kawei ka District” ong u Bah Paul haba bynrap “Kumta phi sngewthuh ïa kane ka jingkren, ngi ïakhun ha ka jylli kaba ka National Party ka BJP ba ialam ia ka jingsynshar kam ïakhun ïa ka elekshon, hynrei ka ai ka jingkyrshan ïa ka NPP , ka Meghalaya kala ju vote pyrshah ïa ka BJP, ka Congress ka dei ka bym larkam bad ka VPP kaba don tang ha East Khasi Hills, mynta, mano ba don lad bha ban jop, ka shong ha phi ban kheiñ jingkheiñ”.
Haba pynpaw ba ka UDP ka dei ka party ba lamkhmat ha Ri-lum Khasi Jaintia, u Bah Paul ula ong “Ka jingshisha ba ngi don haduh 12 ngut ki MLA ka UDP bad 2 ngut ki MLA ka HSPDP bad ngi la jop na bun eh ki constituency ka Ri-lum Khasi Jaintia. Ha kawei ka por, ka UDP kala jop 7 na ka 7 tylli ki constituency ka Ri-lum Jaintia, lada phi ïa nujor bad ka NPP, ka NPP ka jop khyndiat eh ki seat bad nalor kane, wat ha ki ADC, ka dei ka UDP kaba jop bun hynrei namar ka jingbym treikam ka Tenth Schedule, ka la mih ka jingkynthih seng sha ka NPP kaba ïalam mynta ïa ka EC ha KHADC bad JHADC”.