Shillong, Lber 29: Ka ophis Sub Divisional Magistrate ka Sohra Civil Sub Division, ka la pynjari da ka kyndon 144 CrPC ba khang ba ïalum briew ba 4 ngut ne palat, ban rah tiar pynmynsaw bad kren ïa ki ktien ba pynshit hapoh ka Sub Division.
Katkum ka kyrwoh ba la phah ïa kane ka hukum la pynjari namar ka jingsyier ïoh mih ka jingthud ka shongsuk shongsaiñ ha Sohra Sub Division na ka daw ka jingshah pynïap ki arngut ki bar Jylla kaba jia ha shnong Ichamati bad Dalda ha ka janmied 27 tarik Lber.
Ka hukum ka ong ba ki don ki jingsngewkhia halor ka jingshngaiñ ki paidbah bad ka jingïada ïa ki bad kumta la donkam ban shim ïa kane ka sienjam ban nym don shuh ka jingduh ki mynsiem briew bad ban tehlakam ïa ka shongsuk shongsaiñ ha ka thaiñ.
Ïa kane hukum la pynmih da SDM Sononi Verma, bad kan treikam ha baroh kawei ka Sub Division naduh ka sngi Palei tad haduh da pynmih da kawei pat ka hukum.
Ka hukum ka ong ba ym shah ban ïalum paidbah, jingïalang ne ïashong palat 4 ngut ki briew ha kino kino ki jaka paidbah ba hab hapoh ka Sohra Sub Division tad haduh da pynmih da kawei ka hukum. Kane ka hukum ka kynthup ïa ki rally, ki tamasa bad baroh ki jingïalang ba ïalum paidbah.
La pyllait pat tang ïa ki jingïalang jingïaid paidbah ba ïadei bad ka ilekshon Lok Sabha, 2024 hynrei kane ruh ka dei hadien ba la ïoh jingbit na ka Ophis SDO (Election) Sohra.
Ka hukum ka ong ruh ba la mana ïa baroh ki briew hapoh ka Sohra Sub Division ba kim bit ban kren ïa kino kino ki ktien kiba pynshit, pyrta slogan, phah khubor da ka ktien ne ki kor electronic kiba lah ban pynshit lane aiding ïa kane ka jingjia.
La khang ruh ïa ki briew, ki seng, ki kynhun ha Sohra ba kin pyndonkam ïa ki tynghung, amplifier lane kino kino ki tiar hapoh lane ha ki kali shimet lane ki Ïing ki sem lane jaka paidbah lada kim ïoh jingbit na ki bor khmih.
Ka hukum ka ong ba kino kino kiba pynkhreh ïa kane ka hukum kin shah pynsajia kat kum ka kyndon 188 jong ka Indian Penal Code (IPC).
