Leit jurip ka FKJGP, Syiem bad Hima Mylliem ïa ka jaka ba thmu pynlong jaka theh ñiut ha Umnowe

0

Nongpoh, Risaw 14: Ka FKJGP, North Khasi Hills District unit ryngkat ka FKJGP Byrnihat bad Baridua Circle lem bad u Paiem ka Raid Marwet ryngkat ki Basan bad Myntri na ka Hima Mylliem mynta ka sngi ki la leit ban jurip ïa ka jaka na ka bynta ban pynlong kum ka jaka theh paidbah hapoh ka Raid Marwet.
Na ka liang ka FKJGP, North Khasi Hills District Unit lem bad ka Byrnihat bad Baridua Circle ki la shim khia ïa kane ka kam ban wad ïa ka jaka theh ñiut ka dei halor ka nongrim ba kum ka seng ka sngewkhia halor ka jingbret pathar ïa ki jaboh ha ki jaka paidbah bad lyngba ka jingkular u Syiem ka Raid Marwet bad ka Hima Mylliem ban ïa ïa kane ka jingka theh ñiut ki la leit ban jurip mynta ka sngi ha ka jaka kaba don ha ka Shnong Umnowe hapoh ka Raid Marwet ba hap ha ka Hima Mylliem.
Ha kane ka jingleit jurip ïa katei ka jaka la don ryngkat naduh u Vice President ka FKJGP, North Khasi Hills District Unit, u Bah Lumlang Mawnai, ki nongïalam ka Circle na Byrnihiat bad Baridua bad kynthup ruh u Paiem ka Raid Marwet, u Paiem Ken Syiem, ki Myntri bad Basan na ka Hima Mylliem ba kynthup ïa u Myntri K. Langstieh, u Myntri S. Sohtun, u Basan Nongkseh bad u Basan Nongumlong.
Kane ka jaka kaba la thmu ban ai ei da ka Raid Marwet na ka bynta ban pynlong ïa ka jaka theh niut ka don ha ka Shnong Umnowe hapoh ka Raid Marwet bad ka don ka jingheh kumba 3 kar bad kaba don ruh hajan ka surokbah ban ïaid na Killing sha ki shnong ba hap ha ka thaiñ Pilangkat bad Umtyrnga.
Na ka liang u Basan Nongkseh bad u Paiem Ken Syiem haba kren sha ki Nongthoh Khubor, ki la pynpaw ka jingkmen halor ka jingiohi jngai ka seng FKJGP ban don noh kata ka jaka theh ñiut paidbah na ka bynta ki shnong ba hap ha ka thaiñ Raid Marwet bad kane ka jaka theh ñiut ka long kaba donkam namar kan poi ka por ba wat ïa ki jaboh ngim don shuh kita ki jaka ban leit theh bad kane ka ktah ïa ka koit ka khiah bad ka mei mariang, hynrei lada ioh noh da kata ka jaka theh ñiut kaba long katkum ka juk stad ba mynta (Soloid Waste Management) kane kan ïarap shibun ïa ki paidbah bad ngi lah ruh ba wan rah ïa ka khuid ka suba.
U Basan Nongkseh ka Hima Mylliem bad u Paiem Ken Syiem, ki la ïathuh ruh kumba ki la dep ban jurip ïa kane ka jaka jong ka Raid bad nangne shakhmat kin lum ruh ïa ki nongïalam Shnong bad ki paidbah Nongshong shnong ban pynshai halor ka jingdonkam ban don noh kata ka Solid Waste Management ha kitei ki thaiñ bad kin lum ruh ïa ki paidbah ban pynshai halor kane ka jingthmu ha kaba lada ngim ioh jaka mynta kan poi ka por ba ngin mad jingeh wat ïa ka jaka ban leit theh ïa ki jaboh ne ki ñiut kaba long pynban ka jingma ïa ka mariang bad ka koit ka khiah ki paidbah ha ki pateng ban sa wan.
Na ka liang u Vice president ka FKJGP, North Khasi Hills District Unit, u Bah Lumlang Mawnai, u la ong ba ka daw kaba la pynlong ïa ka seng FKJGP ban wad ïa kine ki jaka theh ñiut, ka dei namar ba ka seng ka la lap ba bun ki paidbah ki la shu bret pathar ïa ki jaboh ha ki jaka paidbah bad kane ka jingbret pathar ïa ki jaboh ka wan rah ym tang ban pynjah burom ïa ka jylla bad ka ktah ruh wat ïa ka koit ka khiah ki paidbah bad ka ktah ruh khamtam ïa ka mariang kaba ngi donkam ban ïada ïa ka mei marriang.
Shuh shuh, u la ong ruh ba ka seng ka khmih lynti ruh ba kane ka jaka ba la ai da ka Raid Marwet bad ka Hima Mylliem kan long shisha ka jaka kaba ngi lah ban pynlong kum kata ka jaka theh ñiut paidbah bad kum ka seng ruh kan ïaid da ka lynti ban ïa don bynta haduh ban da urlong kane ka jingdonkam ki paidbah kaba ngi tip kum kata ka Solid Waste Management kaba long katkum ka juk stad ba mynta ban nym ktah ïa ka koit ka khiah ki paidbah bad ruh ïa ka mei mariang ha kaba naduh ka seng, ka Hima Mylliem bad u Syiem ka Raid Marwet kin pynsngewthuh sha ki paidbah ba la donkam ïa kane ka jaka theh niut na ka bynta ka pateng ban sa wan jong ki khun ki kti jongngi, u la bynrap.

Leave A Reply

Your email address will not be published.