Jowai, K’Lyngkot 17: Ka Khasi Student Union (KSU) West Jaiñtia Hills District hapoh ka jingïalam jong u President samla Laitphar Syngkrem bad u General Secretary samla Leningrad Tariang mynta ka sngi ki la leit ban ïakynduh ïa u Deputy Commissioner ka West Jaiñtia Hills bah B.S. Sohliya (IAS), hadien ba ka Seng ka lah lap ba ka sorkar Assam kam kheiñ snep eiei ïa ki jingïakren bad ka sorkar Meghalaya hadien ka jingjia ba sngewsih ha mukruh 22/11/2022.
La pynsngew ba na ka liang ka sorkar Assam ka la pynsted pynban ban tei ïa ka office jong ka tnat forest jong ka kaba ka shna beaiñ ha Mukroh da kaba tei ïa ki kynroh pynheh ïa ki office bad shna ïa u surok sha Samatan bad ruh kaba sngewpyndom ïa ka Seng ka long ba ka sorkar Assam ka lah pynjulor ka ki lynti leit lyngkha ki paidbad da kaba tih da ki thliew bad pynur da ki diengbah kapdeng lynti.
Ha kane ka jingïakren bad u DC ula pynsngew bad kular ban shimkhia ïa kane ban ïa kynduh bad ka DC jong ka Karbi Anglong kumjuh ruh bad u DIG jong ka Karbi Anglong ha ka 27 Tarik mynta u bnai ban ïakren ïa kiei kiei kiba jia ha kine ki sngi kiba lah dep bad ruh ban khanglad ïa ka Assam ban nym wan pyndik ne tuklar shuh shapoh ka jylla.
Halor kane na ka liang ka seng kan ap ïa kane ka tarik ba ki lah buh ban ïakren hapdeng ka Assam bad Meghalaya lada ka jingïakren kam seisoh bad ka sorkar Assam kan ïaibteng ban pyndik ïa ki paid nongshong shnong jong ka bri hyññiew trep kiba shong basah sha ki thaiñ khappud (Block-1) ka Seng kam ban se ban shim da kiwei pat ki lad ki lynti bad ka sorkar ka dei ban shim ïa ka jingbah khlieh, kane ka long katkum ka kyrwoh ba la phah da u General Secretary ka KSU West Jaiñtia Hills District.
