Jowai, K’Lyngkot 16: Ka Synjuk ki Waheh Chnong Ri Jaiñtia (SWCRJ) ka buh ka jingkyntu ïa baroh ki nongshong shnong jong ka Ri-Lum Jaiñtia (East & West) ba kin long kiba shemphang ban jied ïa ki nongmih khmat ha kane ka Election MLA 2023 ym da ka pisa khnang ba kan long ka Election kaba khuid ba suba.
U President ka SWCRJ ma Army Lipon ula ong ba ka jingïalang kaba la long ha ka 22 tarik u Nohprah 2022 kila shim ïa ka rai ba ki jingïalap Election Campaign ha ki Dong ne ki Shnong bapher bapher kim dei shah ïa kano kano ka kynhun ban ïalam bun ngut ïa ki nongkyrshah kumba long ha ki snem ba la dep, namar kane ka wanrah jingeh ïa u kyrtong ha ka jinglut jingsep, ka jingïaklumar, ki jingjaboh bad ka jingsahkut kali nalor kiwei de.
Ha ka juh ka por la kyntu jur ïa baroh ki Waheh Shnong jong ki ar District ba kin ïaleh ban teh lakam ïa kine ki jingeh, da kaba pynmih ia ki kyndon jingmana ha ki shnong jong ki kata ba kim dei ban shah palat ïa saw tylli ki kali bad kawei jong u kyrtong ban rung shapoh ki dong ne ki shnong.
Ha kaba ïadei bad kane u General Secretary ka SWCRJ u Bichar Shylla ula buh ka jingkyntu ïa ki Waheh Shnong ba kin ïaleh katba lah ban pynïaid beit ïa kane ka kam Election MLA da ka jingïasngewthuh jingmut lang kawei jong baroh lang khlem da don kano kano ka jingïashah liang.
Ula kyntu jur ïa ki khun samla ba kim dei ban shim kabu ha kum kine ki por khamtam ha ka jingïadih buaid da kaba pan pisa klumar na ki kyrtong, hynrei kum ki samla ki dei ban don ka bynta kaba khraw ban mih shakhmat ban ïaleh pyrshah ïa ki kam sniew.
La pynsngew ruh da u Joint Secretary ka Synjuk, u ma Tellme Phawa da kaba ong “lada ki paidbah ki shim ïa ka pisa na ki kyrtong bad ynda ki kyrtong kila jop kim lah shuh ban wanrah ïa ki kam pynroi ha kiba bun ki bynta”.
Shuh shuh ula ong ba ka Ri-Lum Jaiñtia kadei kawei na kiba la sahdien bha ha baroh ki liang khamtam ha ka pule ka puthi, kumta ka por kala dawa ban don noh ïa ki skul bah hapoh kine ki ar tylli ki District, khnang ba kane kan kham pynsuk ïa ki kmie ki kpa kiba phah leit pule ïa ki khun jong ki bad kim donkam shuh ban phah shabar ha ka jinglut kaba bun.
