Jowai, Risaw 10: U Symbud myntri Rangbah ka sorkar jylla u ma Sniawbhalang Dhar hynnin ka sngi 9 tarik u Risaw 2023 ula leit ai mynsiem ïa ki nongshan phlim ka jylla da kaba leit peit ïa ka phlim Pnar kaba ai kyrteng ka JOHKHE.COM ha Bijou Cinema, Shillong.
Kane ka jingleit ai mynsiem jong u Symbud Myntri Rangbah kaba khlem poi pyrkhat (surprise) kaba la pynkmen shi katdei eh ïa kitei ki nongpynmih ïa ka phlim Johkhe.com bad ka long ruh kum ka jingai mynsiem ba kin dang lah ban pynmih shuh shuh ïa ki Phlim Pnar ha kine ki sngi ban wan.
La ïathuh ba ïa kane ka phlim la sdang ban pyni paidbah naduh ka 6 tarik u Risaw ha Bijou Cinema kata haka por 11 baje mynstep, 2 baje nohphai sngi, 5 baje janmiet bad haka por 7 baje janmiet.
Ïa kane ka phlim la thoh da u Marboon Laloo bad u Daohipaia Toi kiba long ruh ki producer/Actor ha kane ka Film, ïa kaba la direct da u ma Kiki Garod uba paw bha ha ka kam shna shna film bad ring video katkum kane ka juk ba mynta.
Ha kajuh ka por na ka liang ki nong pynmih ïa kane ka phlim kila pan ka jingkyrshan na ki paidbah ba kin wan ban sakhi lang ïa kane ka phlim kaba dang pyni mynta ha Bijou Cinema, Shillong ka ban neh kumba shibnai eiei hashwa ban pyni ïa ka sa ha Jowai.
