Nongstoiñ, Lber 10: Ka Hynñiew Trep Youth Council HYC Nongtrai circle ha ka sngi saitjaiñ, ha ka jingïalam jong u secretary u Blastarland Sohmad bad u vice president u Johnpaul Kharsohphoh, ki la leit ban jingïarap ïa kawei ka longïing ka kong Magdalina Ïawphniaw bad u Francis Dkhar ha shnong Nongrim, kaba la shah bam duh ka ïing ha ka ding ha ka jingjia kaba la jia ha ka 7 tarik mynta u bnai.
Ka shnong Nongrim thawrat ka don hajan jong ka shnong Riangsih bad kane ka longïing ka la don lai ngut ki khun kynthei bad uwei u khun shynrang. La ong ba ki trai jong kane ka ïing ki ïoh kum bakla hi ba ym pynlip ïa ka ding ha ka por ba ki shet jingshet hapoh ïing, ha ka por ba ka kmie ka dang leit shim bynta ha ka program jong ka V.O hapoh shnong Nongrynñiaw.
La ong ba hadien ba ka la wanphai na ka program, ka la ïohi ba ka ding ka dang klang bha, ha kaba ki dkhot jong ka ïing ki la pyrshang ban tem ïa ka hynrei kim lah satia. Ha kane ka jingjia, kane ka longïing ka la duh ïa shibun ki tiar ki tar bad ki jingdon jingem baroh naduh ki tin sop ïing, ki tiar shet tiar tiew, ki jaiñ ki nep, ki ksiar ki ksah bad u kpa u khaw baroh.
Na ka liang ka seng kat I bor I ba rit ka la kner ïa la ki jingïarap ïa kane ka longïing ba la shah bam duh bad lyngshop ha ka ding. Ka seng ka kyrpad ruh ïa ki para sengbhalang bad ïa ka sorkar ban phai khmat ban kner jingïarap sha kane ka longïing.
