Shillong, Lber, 10: U General Secretary ka Khasi Students Union (KSU) ha ka sngi Balang u la plie paidbah ïa ka Maitshaphrang Fitness Centre hapoh ka shnong Mawïongrim ïa kaba la pynbit pynbiang da ka KSU Mawïongrim Unit.
Ha kane kajuh ka sngi, une u nongïalam ka seng u la pynskhem ruh ïa ki nongkitkam ba thymmai jong ka KSU Mawïongrim Unit na ka bynta ka samoi treikam jong u snem 2024-2027
Ha ka jingplie ïa kane ka jaka kilan met la sakhi lang u Vice President samla Biangbor L.Paliar, u Sports Secretary samla Eric Nongkynrih, u Assistant secretary ka Mawlai Circle u samla Donboklang Sawkmie, Assistant Finance Secretary samla Robert khongsit bad kiwei kiwei.
Haba ai jingkren sha ki nongkitkam bathymmai jong ka shnat treikam ka KSU Mawiongim Unit u Samla Donald Thabah u la kren shaphang ka jingïohrung ki mynder lyngba ka shongkha shongman bad ka jingleh Benami ki trai ri trai muluk kaba pynïohlad ban buhai shnong bad ban khaii laitluid ha kane ka jylla.
U la banjur ruh ïa ka jingkynrei stet u drok ha manla ki kyndong kynshrot ha ki jaka ba don tang para Khasi bad ka lah ban dei ka jingleh jongno re kiba kwah ban pynngop ïa ki samla Khasi ha une u jingdih ba shyrkhei khnang ba ki samla Khasi kin troiñ ha baroh ki liang.
U la kyntu ruh ïa ka Mawïongrim Unit ba ki dei ban peitngor bha ïa ka ïaid ka ieng ki mynder kiba ju ïaid manla ka khyllipmat na ka surokbah kiba ym lah ban tip ïoh ki dei kiba wan leh ki kam sniew laiphew jait ban pynsniew dur ïa ka imlang ka sahlang ha kane ka Jylla.
