Nongstoiñ, Lber, 10: Ki nongïalam bad ki nongkyrshan jong ka Hill Sate People Democratic Party (HSPDP) jong ka ri lum Khasi bad Jaiñtia, hadien ba ki la ïohi lyngba ki lad pathai khubor ba ka kong Elizabeth Mathew Nongbri kaba la kam ïalade ba ka dei ka nongseng jong ka North East Sunshine Trust (India), ka la phah da ka jingthoh sha u Dr Jitendra Singh Myntri Khynnah ba peit ïa ka tnad Atomic Energy ban sdang biang ïa ka jingtih Uranium ha Meghalaya, ki la bitar lep bad ki la byrthen da kaba tyngeh ba kin ym ailad da leilei ban sdang ïa ka jingtih Uranium hapoh ka jylla.
Ka kong Badariti Lyngdoh Nonglait president ka HSPDP Sengkmie (Women Wing), ha u kyrwoh ba la pyllait mynta ka sngi, ka la ong ba ka jingtih Uranium ha rilum Khasi bad Jaiñtia ka la sdang ha ki snem ba mynshuwa. Hynrei u (L) Maieit Hopingstone Lyngdoh u nongseng jong ka party HSPDP bad u (L) Pastor P.B.M Basaïawmoit ryngkat ki sengbhalang jong ka jylla, ki la ïeng pyrshah bad ki la ïakhun ban ym ailad ban tih Uranium. Ki la jop haduh ba baroh ki nongtrei jong ka Uranium Corporation India Limited ka Kompeni kaba tih ïa utei u marpoh khyndew ki la hap ban phet krad noh.
Nalorkata, ka la ong ruh ba u (L) Maieit Hopingstone Lyngdoh u la leit ban ïashim bynta ruh ha ki jingïalang pyrshah Uranium jong ki ri ka pyrthei kum ha Germany, Switzerland, Hungary bad kiwei kiwei ki dorbar bah jong ki ri ka pyrthei kiba pyrshah Uranium, ban kyntu ba kin ai jingkyrshan lem halor ka jingpyrshah jong ka HSPDP ban tih Uranium hane ha ri lum Khasi Jaiñtia. Ha kajuh ka por ka la ong ba da ka jingpyrshah jong ka HSPDP ban tih Uranium la jop shisyndon.
Katei ka nongïalam jong ka HSPDP sengkmie ka la kynthoh ruh halor ka jingkam jong ka kong Elizabeth, ba ka jingpyrshah tih Uranium ka dei namar ba ki ïoh jingmyntoi bad ka la pan jingpynshai ruh na katei ka nongseng jong ka NEST, ba lada ki ba pyrshah tih Uranium ki ïoh jingmyntoi ka dei ban pyni da ki jingpynshisha kiei kita.
Ka la ong ruh ba haduh mynta ka HSPDP ka dang ïakren bad ka dang ïai khot ïa ki nongshong shnong, ki trai khyndew bad ki paitbah kiba shong ha ki jaka ba don Uranium kum ha Domïasiat, Kylleng, Pyndengsohïong bad kiwei ba kim dei ban ailad ban tih Uranium.
Lada ka sorkar India ka dang thmu ban wan khlong Uranium biang, na ka liang ka HSPDP kam banse ban shim da kiwei pat ki lad ki lynti ban khang lad ïa katei ka jingthmu. Ka HSPDP kan sa pynsngew biang sha ka sorkar ba kam dei ban shah lada don jingthgmu ban tih Uranium ha kano kano ka por.
Ka la ong ba lada ailad ban khlong biang ïa u Uranium na ri lum Khasi Jaiñtia, ka jingma kaba khraw ka ap ïa ka jaitbynriew namar u Uranium u don ka bih kaba shyrkhei kaba ktah ym tang ïa ka koit ka khiah jong ki briew. Hynrei wat ïa ki jingthung jingtep, ki mrad ki mreng bad baroh ki jinggthaw ba im. Kumta horkit hordang kan ym shah bad kan ïai pyrshah ïa katei ka jingthmu.
Shuh shuh ka la ong ba bun ki paitbah ki kynnoh ba ka HSPDP ka leit ban kyrshan ïa ka sorkar NPP, hynrei wat la ka HSPDP ka leit ban ai jingkyrshan ruh kam shym la kynriah na ki nongrim ba ka party ka ïeng naduh ba sdang, hynrei ka shu leit ban kyrshan na ka bynta ka roi ka par ha ki Constituency.
