Jowai, Jymmang 27: Ka Seng jong ki nongshetja sngi ha ki skul ha Ri-Lum Jaiñtia, ka All Jaiñtia Midday Meal Worker Association ha ka 26 tarik May kala pynlong ïa ka jingïalang ba kyrpang ha Yungwalieh ka Panaliar bad ha kane ka sngi la pynlong ruh ïa ka jingpynkup burom ba kyrpang ïa u samla rangbah u Khroo Lamsalanki Pariat, Adviser AJMDMWU.
U Jerry Anderson Suting, President, AJMDMWU ula pynïaid ïa ka jingïalang bad ai ïa ki kyntien pdiang burom bad ka jingnguh Blei. Kiwei de ki rangbah kiba ïadon lem ha kane ka sngi ki kynthup ïa u ma Deibormi Syngkon, Waheh Chnong Tpep-Pale, u Damehiwothi Pde waheh Chnong Chilliangraij.
La ïoh ruh ïa ka jingkren ai mynsien ïa ki dkhot ka All Jaiñtia Mid-day Meal Worker Union da ka kong Banalis Syiem, President Ribhoi District Mid-day Meal Worker Association kumjuh na u ma Longda Bamon In-charge Min-Day-Meal Thadlaskeiñ-Laskeiñ Block.
U ma Longda ula ong u katba u la pyrshang ban leh ïa kaba bha tam na ka bynta ka jingmyntoi jong ki khynnah skul bad kumjuh ruh jong ki Nongshetja sngi. Ula pynkynmaw ba ka sorkar kala lah ban pynkiew ïa ka honorarium jong ki sha ka 2 hajar tyngka bad nalor kane kan sa siew ruh ïa ka Arear kaba 8 hajar tyngka.
Ka Banalis Syiem, President Ribhoi District Mid-day Meal Worker Association ha ba ai jingkren kala pynpaw ka jingsngewnguh kaba khraw ïa ka AJMMWU bad kyrpang ïa u ma Khroo Lamsalanki Pariat u briew uba shemphang ba ïohi jngai bad uba ai mynsiem uba trei na ka bynta ka hok jong ki nongshet ja sngi ha ki skul.
Kum ka dak ban pynkhraw ïa kane ka sngi ki Block bapher bapher hapoh ka lam jong ka AJMMWU kila shim ïa ka kabu ban pynkup burom ia u ma Khroo Lamsalanki Pariat kum ka dak ka jingsngewnguh sngewburom ïa ki kam uba ula leh ba ka mynta ka jingmyntoi jong ki. Nalor kane kala don ruh ka jingpynkup burom ia ki Waheh Shnong bad ki dkhot jong ka AJMMWU kiba long ki nongkyrshan ba radbah ban pynïaid beit pynïaid ryntih ïa ka seng na ka por sha ka por.
U Khroo Lamsalanki Pariat haba kren ha kane ka sngi u ong ba ka jinglah ban pynlong ïa kane ka sngi ka long namar ka jingïatreilang jong ki briew sorkar kiba dei peit ïa ka Midday Meal, kumjuh ki Seng bapher bapher kiba la trei na ka bynta ka bha ka miat bad ka jingmyntoi jong ki nongshet ja sngi. Kumta u kyntu ïa ki baroh ba kin don ïa ka mynsiem ïatreilang da kaba ïarap markylliang khnang ba ki jingthmu jong ka seng kin long kiba jop.
