Shillong, Naitung 13 : Ki Pulit ka Mawlai Police Station, hynne ka step sngi Palei, ki la ïoh tam ïa ka metiap jong uwei u briew ryngkat u thyrnia injek ha kti, kaba la thiah lyngktar ha Lum Jingtep jong ka shnong Lummawnei, Mawlai
Ki Pulit ki ïathuh ba ïa kane ka metiap la lap nyngkong da ki nongshong shnong ka thaiñ, kiba la pyntip mar mar sha ki Pulit ba kin wan leh ïa kaba donkam. Ki Pulit ki la hiar tohkit ïa ka jingjia bad ki la pynkit noh ïa ka met sha Shillong Civil Hospital ban pyndep ïa ka post mortem.
Ki Pulit ki pyntip ba ïa une u briew la tip kyrteng da u Bah Vicky Lyngdoh Lyngkhoi, kurim jong ka Kong D Marbaniang ba na Mawlai Nongkwar Block 13. Une u briew u don hapdeng ka rta ba 30 haduh 40 snem.
Tad haduh ba thoh ïa ka khubor, ym pat shym la lah ban pynthikna ïa ki daw jong ka jingiap.
