Shillong, Naitung 13 : U Myntri Rangbah ka Jylla Conrad K Sangma ha ka sngi Palei, ula pyntip ba ka Sorkar ka dang ap ban ïoh sa katto katne ki kyrteng jong ki briew na ka bynta ban thung kum u Chairperson ka Expert Committee ba la thaw ban shong bishar ïa ka State Reservation Policy.
U Conrad ula pyntip ha ki nongthoh khubor ba tang kawei ka kyrteng ka dang wan ban thung kum u Chairperson ka Committee.
“Namar kata, ngi sngew ba ki kyrteng ki dei ban don kham bun , na kata ka daw ngi dang ap ban ïoh sa 3-5 tylli ki kyrteng khnang ba ka Sorkar kan ïoh ban bishar. Shisien ba ngi la ïoh ïa ki kyrteng sha ka shuki Chairperson, ngin sa wanrah ha ka Cabinet ba kan shim rai” ula ong.
U pyntip ba ka Sorkar kala ïoh pdiang ïa katto katne ki kyrteng ban thung kum kiwei pat ki dkhot jong ka Expert Committee.
