Shillong, Naitung 13: U Myntri Rangbah ka jylla Conrad K Sangma mynta ka sngi ula pynrem jur halor ka jingshah kawang maw ka ïingsah ka Myntri sorkar kong Ampareen Lyngdoh kaba dei ruh ka MLA ka East Shillong Constituency.
Lah ban kdew ba ha ka 11 tarik mynta u bnai ha ka por 7 baje mynniet, uwei u briew ba rah da ka wait, ula ther maw ïaka ïingsah jong ka jong ka Kong Ampareen Lyngdoh kaba don ha Laitumkhrah.
U Conrad ula ong ba ka long kaei kaei kaba sngewkhia ban ïohsngew ïa kum kine ki jingjia la ka jia ïa ki Myntri Sorkar ne ki Nongmihkhmat paidbah bad na ka liang ka aiñ ruh kan leh ïa kaba donkam pyrshah ïa kiba thmu ban pynthut ïa ka shong suk shong saiñ.
“Kum kine ki jingjia kim dei ban jia ïano ïano ruh, la ka dei pyrshah ïa ki nongthaw aiñ ne ki riew paidbah bad ka dei ka kamram jong ki bor Pulit bad ki bor synshar district ban leh tyngeh pyrshah ïa kum kine ki briew kiba thmu ban thaw jingkulmar ha ka imlang sahlang” la ong u Conrad.
U Conrad ula ïathuh ba na ka liang ka sorkar bad ki bor district kin lum jingïalang ban pynthikna ba kum kine ki jingjia kim dei shuh ban jia nangne shakhmat.
