Shillong, Rymphang 01 : Ka Langsning XI CC ka la ïoh rah ïa ka nam lahduh jong ka lympung ïalehkai kriket ba la pynïaid da ka Khasi Student Union (KSU) kaba la tip kum ka Maitshaphrang Khasi League T20 Cricket Tournament, 2023.
Ka Langsning XI CC ka la ïoh rah nam lahduh hadien ba ka la pynliem da 1 wicket ïa ka Lawsohtun S.C.C ha ka jingïalehkai phainal ha ka sngi Balang ha madan ïalehkai kriket ha Polo.
Haba phai sha ka jingïalehkai phainal, ka Lawsohtun S C.C kaba la jop ïa ka jingïakynting pisa ka la kam trai ban tied nyngkong hynrei ka khlem lah ban kamai bun ron bad kamai tang 79 ron khyllem noh 8 wicket ha baroh ki 20 over.
Dei tang u Kit Nongkhlaw uba la kamai bun ron da 14 ron na ki 27 bol bad kiba la khur wicket na ka bynta ka Langsning XI CC ki kynthup u Sylvester Mylliempdah ha ki 4 over u khur 3 wicket ai kamai 7 ron bad u Deibormi Rangad ha ki 4 over u khur 2 wicket ai kamai 12 ron.
Haba beh ïa katei ka thong, ka Langsning XI CC ka la lah ban pyndep tang ha ki 19.2 over bad duh 9 wicket ha kaba u Deibormi Rangad u kamai 24 ron na ki 36 bol bad u Heimon Lyngdoh da 18 ron na ki 21 bol.
Kiba la khur wicket na ka bynta ka Lawsohtun S.C.C ki kynthup u Edmund Dhar da 3 wicket ha ki 4 over ai kamai 13 ron bad u Peter Lyngkhoi u ïoh 2 wicket ai kamai 18 ron ha ki 4 over.
Ïa ka nam Man of the Match ha kane ka jingïalehkai la ïo da u Deibormi Rangad jong ka Langsning XI CC uba kamai 24 ron bad khur 2 wicket.
Ha kane ka sngi ka Kong Amanda Pakynteiñ ka long kum ka kongsan bad sam ruh ïa ka trophy sha ka kynhun lahduh.
