Shillong, Rymphang 01 : Kum shi bynta ban ai mynsiem bad ban kyntiew ïa ki khynnah jong ka shnong, ka Wahlakhiat Pyllun Sports Club ym tang ba ka kyntiew ha ka liang ki kam ïalehkai hynrei ha ka liang ka rwai ka siaw, ka put ka tem bad ha ka liang ka shad. Kumta ha ka sngi Saitjaiñ jong ka taïew ba lah dep ka la pynlong da ka jingpynïakob shad kaba la tip kum ka Ri War Dancing Competition ha phyllaw jong ka ïing Dorbar Hall Wahlakhiat, Mawkynrew C&RD Block EKHD.
Ka Wahlakhiat Pyllun SC ka la pynlong ïa katei ka jingpynïakob shad lyngba ka jingkyrshan pisa da ka Yess Meghalaya ha ryngkat ka motto kaba ong “Baroh u briew ba stad mano ba lah ban len lada khlem plie ka lad kumno un lait ban kren”.
Ha katei ka sngi ka Kong Amanda Pakynteiñ kaba dei ka Chairperson jong ka Mawkynrew Cup Committee ka la ïadonlang kum ka kongsan kaba la ïashim bynta lang ruh ban shad kaba la pynshongshit ïa ki paidbah kynthup naduh ki longkmie longkpa, ki samla kynthei bad shynrang haduh ki hep kiba rit.
La ïadonlang ruh u Bah Rishoit Kshiar uba dei u Sordar Snong Wahlakhiat kum u sumbud kongsan, Bah Rishai Suting uba dei u President jong ka Sports Club bad kiwei kiwei ki nongkitkam. Ha katei ka sngi la ïoh ka jingkren pdiang da u Bah Kenedy Ryndong bad la pynïaid ïa katei ka prokram da u samla Vicky Jana.
Ki nongïashim bynta ha ka jingïakob shad ki don 32 ngut ba la phiah ha la ki jong ki kyrdan kata 19 ngut ha ka U-14, 13 ngut ha ka U-10. Ha ka U-10 ïa ka nam jop la ïoh da u heprit Wandasara Tangsong ha ka liang ki kynthei bad ha ka liang ki shynrang la jop da u heprit Rapborlang Tangsang. Ha ka kyrdan U-14 ïa ka nam jop la ïoh ra da i Habanbha Ryndong bad i Speshon Khongjoh ïa ka nam ba ar.
Ka jingpynlong jong ka Wahlakhiat Pyllun SC ïa kaba kum katei ka jingpynïakob kadei ka sien kaba nyngkong eh ha kaba ki khynnah ki la dap da ka jingsngewkmen ba kim pat ju ïoh mynno mynno ïa kaba kum katei ka lad.
Ka Kong Amanda Pakynteiñ haba ai jingkren ka la ai khublei ïa ki nongpynïaid jong ka Sports Club kiba la shim ïa katei ka sienjam kaba long ka jingai mynsiem bad plie lad plie lynti ïa ki khynnah kiba don shisha ïa ka sap shad. Ka la ai mynsiem ïa ki khynnah ba kim dei ban don ka jinglehraiñ hynrei ba kin shad da ka jingkmen khnang ba ka jinglehraiñ kan phet sha jngai.
