Mawkyrwat, Nohprah 05: Ka Ïaipyrchang Football Club ka la long ka lahduh ha ka lympung ïalehkai kynjatbol jong ka Mawlangwir Sports Club kaba tip kum ka Rowell Lyngdoh Memorial Football Tournament 2024 ha madan Rowell Lyngdoh Stadium, Mawlangwir South West Khasi Hills District.
Lah ban kdew ba ka jingjop bad rah ïa ka nam lahduh jong ka Ïai Pyrshang Football Club ha katei ka lympung ka dei hadien ba ka la pynliem noh da 1 – 0 kol pyrshah ïa ka Jakrem Sports Club.
Ha ka jingïalehkai kaba dei ha ka kyllastep, ka Ïai Pyrshang FC naduh ba sdang ka la lah ban ïalehkai bha da ka jingthmu ban rah ïa ka nam jop, kumta ha ka minit kaba 22 ka la ïoh ban pynkhih jar nyngkong lyngba u Silvester Thongni.
Haba wan biang sha ka jingïalehkai jong ka kyllamiet, wat la ka liang ka Jakrem SC ka la pyrshang kat lah kat ïai ban ïakhun tyngeh na ka bynta ban pynphai ïa ka kol, hynrei haduh kaba kut jong ka jinglehkai kam shym la lah ban pynurlong bad ka la mad ïa ka jingshahrem da kaba ka la shah tam noh da 1 – 0 kol.
Hadien ka jingïalehkai la ïoh ban sam ïa ki khusnam sha baroh ar ki kynhun kaba jop bad kaba shah rem noh da ka khusnam ryngkat ka song pisa. Nangta, ka don ki khusnam shimet kata ka khusnam ‘rangïalehkai ba tbit ka leit sha u Michealboy Nongsiej jong ka Jakrem Sports Club bad nongthep bun kol dei u Silvester Thongni jong ka Ïaipyrchang Football Club bad u thep 3 kol.
Ïa ka Rowell Lyngdoh Memorial Football Tournament 2024 la wan ban pynhap pyrda da u Pa’iem Niandro Syiemiong uba dei u Syiem jong ka Hima Maharam ha ryngkat ka jingïadonlang u bah Renikton Lyngdoh Tongkhar, MLA ka Mawkyrwat Constituency, u bah Diverland Lyngdoh, ki khun ki ksiew jong u (L) bah Rowell Lyngdoh, u bah Benjohson Lyngdoh, Secretary Mawlangwir SC, u Bah S.E.Wanniang, Vice President lem bad ki riew Rangbah.
Ha ka sngi pynhap pyrda la ïoh ban pynshit pyrshngaiñ da ki sur jingrwai na u Bah F.M. Lyngdoh bad ki jingshad na ka Photlangdew Group.
