Shillong, Nailur 24: Ka Smart Road kaba la pyntrei da ka PWD ha Lawer Lachumiere kaba la shah ktah matïong ha kiba bun balang namar ba khlem pyndep ïa ka kam kumba la thmu bad kane ka la buh ïa ki paidbah ha ka jingeh ha ka leit ka wan.
Lah ban ong ba kane ka surok ka sdang nakhmat ka ophis jong ka MPSC bad ka mih shakhmat ka ophis ka tnad khlaw, ka jingtrei ka la sah kut mynta la jan ar snem bad hadien ba ka sorkar ka la rai ban pyndam noh ïa ki Smart Road mynta ka la sdang ban shna pynbha ïa kane ka surok kaba ki kali kim lah shuh ban ïaid. Mynta la lai sngi la ïohi ba ki nongtrei ki la sdang ban trei bad hakhmat ka ophis jong ka MPSC la sdang ban siang dewbilat ha ki jaka balait bad ha kaba kut shuwa ban iasoh bad ka surok kaba khlem pat dep la sdang ban trei mynta ar sngi.
Kane ka Smart Road ka la long ka jinglehrain hakhmat ki paidbah nongshong shnong kane ka nongbah Shillong namar kane ka jingtrei kaba la pulom khlem lah ban pyntrei kam kum kaba la thmu haba shna ïa kane ka surok.
