Shillong, Nailur 24: Ki bor pynïaid ka Airport Authority of India (AAI) ki la ong ba ka jingpynheh ïa ka Shillong Airport Runway da 571 meter yn lah ban ïoh ha ka jinglut kaba kot T. 100 klur na ka Sorkar Jylla, laitnoh kiwei pat ki jinglut ba la bei hi da ka AAI ha kaba ïadei bad ki kam pynbha kaba kot T. 500 klur.
Halor kane ka jingtyrwa ïa mynta dang ap ïa ka rai jong ka kynhun myntri ka sorkar jylla.
Ha ka hukum ba la pynmih ha ka sngi Baar haba shim bishar ïa ka PIL halor kane ka kam, ka Ïingbishar ka la ong ba na ka liang jong u General Manager Planning ka AAI u Dr Gursewak Manish un ai ki lad jingïarap ban batai bniah ïa ki jingdonkam haba ïadei bad ka jingpynheh ne pynïar ïa ka Shillong Airport.
“Ha ka jingbatai jong u Dr Gursewak Manish la ong ba ka LiDAR survey, yn jurip ruh ïa baroh kawei ka Airport haba ïadei bad ki jingdonkam. Ha kaba ïadei bad ka jingheh ïa ka runway da 571 meter, la ong ba lada ïa kane ka jingtyrwa la mynjur da ka sorkar jylla bad da ka Regulatory Authority kaba dei ka Directorate General of Civil Aviation (DGCA ), ïa kane yn lah ban poi ha ka jinglut kaba T. 100 klur da ka sorkar jylla,” ong ka hukum.
Ka Ïingkashari ka la ong ba ïa mynta na ka liang u Advocate General u la pyntip ba kane ka jingtyrwa lah buh hakhmat ka Iingbishar mynta ka sngi bad ïa kane ruh yn sa rah sha ka Kynhun Myntri bad ïa ka rai halor kane ka jingtyrwa yn lah ban ai ha kane ka taïew.
La ong ruh ba tang shu la ïoh ka jingmynjur na ka Sorkar Jylla na ka liang jong ka AAI kan sa lah ban pyntyllun shakhmat ïa ki kam ki kam ha kaba ïadei bad kane ka bynta.
