Shillong, Nailur 24: Ka Myntri ka tnat ka Koit ka Khiah ka kong Ampareen Lyngdoh ha ka sngi baar ka la ong ba ka sorkar kam don jingthmu ban pynkynriah ïa ka Opioid Substitution Therapy (OST) Centre na Shillong Civil Hospital.
“Nga la dep ban pynlong ka jingïalang bad jingïasyllok naba ka la don ka jingdawa ban pynkynriah ïa ka OST na kane ka jaka, hynrei sniew bok ba ka aiñ kam shah ïa ngi ban leh ïa kane ka kam,” ong ka kong Lyngdoh.
Katkum ka jingong jong ka, ka la ong ba kam dei ka kam kaba suk ban beh ïa ki briew khamtam kito kiba donkam ka jingïarap.
“Nga kmen ruh ba ka drug user association ka la wan shakhmat. Ngim dei ban beh tang ïa ki briew ban buh ïa ki ha ki synduk hynrei ngi donkam ruh ban ïarap ïa ki da kano kano ka lynti,” ong ka kong Lyngdoh.
Haba kyrpad ïa ka HYC ban shim khia ïa kane ka bynta da ka rukom kaba dei na ka liang ka kong Lyngdoh ka la ong, “Ki don ki aiñ kiba ïalam lynti ïa ngi. Ngim lah ban treikam shabar jong ka aiñ, naba ki don ki jingmynjur, kumta nga la kyrpad ïa ki ban shakhmat ban ïarap ïa ngi.”
“Namar kata ai ïa ngi ka por ba ngin lah ban peit ïa kane ka kam. Ngi donkam ban ai ka jingïasyllok kaba biang. Ngi donkam ban wanrah ïa ki sha ka lynti kaba dei khlem da bishar ïano ïano ruh,” ka la ong da kaba pynthikna ba ka sorkar kan leh ïa ka kam kaba kongsan ha kaba ïadei bad kane ka bynta.
