HT Wells
Ym lah ban len ba ka jingstad bad jingtip ka par stet haduh katta katta ha kane ka juk science & technology ha kaba ki Lad pathai khubor ki shim ïa la u jong u synñiang u bynhei bad ïarap tynrong lem ïa katei ka kam. Dei namarkata ka daw ba ngi lah ban ïoh ïa ki khubor na kylleng pyrthei bad wat hapoh ka Ri lajong ruh tang ha ka shiphew minit ne shikynta duh. Myn arphew snem tam mynshwa, bun na ngi ngi ïoh ban pule khubor tang shisien shitaïew bad kata ruh ba phin da ïoh ban pule hun lada lum-thup kumba lum u ‘Dongmusa’, lym kumta phim don jinghun
satia.
Ka long kaba shisha, ba uwei pa uwei nangi ngim lah shuh ban im khlem ki lad pathai khubor, namar ka la poi ka por ba ngim lah shuh ban ap tang lashai ruh ba kan mih ka kot khubor hynrei ngi pynlut por bun kynta ha ka shisngi ban syllud (browse) ïa ki androit mobile phone jong ngi ban ïoh jingtip jia aïu bad don khubor phylla aïu mynta ka khyllipmat. Ka don ka jingkren pharshi da ki tymmen jong ngi mynshwa, ki ong bam dohpyut ka tyngab sha Kharkata (Kolkata) sma dohpyut shaduh shane, (ki thew pharshi ïa ki khubor hamasaia ban ïa ki khubor bashisha) hynrei mynta tip lut, namar ki Lad pathai khubor ki shim ïa ka lad ym tang ban kamai jakpoh hynrei ban shakri ban pyntip sha ki nongshongshnong, ïa kaei kaba la jia khamtam haba ka pyrthei ba ngi im ka long tang kum kata ka global village. Ngi sngewnguh shisha ïa kata, lada ym dei na ki lad pathai khubor kat ban poi ka khubor Lockdown jong u Modi ha ka por ba ka wan ka khlam Covid-19 shane, te u paidbah la shaïong ngaiñ.
Hynrei hapdeng jong kine kiei kiei to ngin ïapeit bniah namar ryngkat bad ka jingmyntoi ba ngi ïoh ka don bun ruh ki jingduh jingmyntoi ne jingshahktah, to ngin peit nyngkong ïa kita ki ‘Social Media’ kiba ka sorkar Meghalaya lyngba ka DIPR department ha kine ki khyndiat sngi ka la pynmih hukum ba dei ban register shwa ïa ki : Social media ka la pynkylla lut nadong shadong, kumno ngi im, kumno ngi ïakren bad kumno ngi ïoh ïa ki jingtip. Ka don shibun ki jingmyntoi, namar ba ngi lah ban ïakren bad kiba ieit ba thoiñ bad ki paralok jong ngi, ngi trei lyngba ki network bad ïasam ïa ki symboh jingtip (content) bad jingmut lyngba ka rynsan jong ka. Ka social media ha ka ïarap shibun ban pynskhem ïa ka jingïadei jong ngi lyngba ka jingpathai khubor bad ka ailad ïa ki briew ban ïajan, kam pher wat la ka jngai ka thaiñ ne ka ri ba ki shong ki sah (geographical distance). Kumta ka jingïoh jingmyntoi lyngba jong kane, ka long ba ka pynlah ïangi ban ïasam ïa kino kino ki jingjia, ki dur ki dar, ki khubor, ka pynskhem ïa ka jingïadei bajan bha ha ka jaka ba ngi im ngi sah. Ka Social ka ïarap ba ngi lah ban ïa pathai bad ki paralok barim bajah, lehse kaba lah ban pynjngai bad klet syndon ïa ki namar ka jingjngai bad ka por shaduh ka jaka ba ki shong ki sah. Ka lah ruh ban plielad kumno ba ngin ïoh ïa ki jingtip babniah shaphang ki khubor bad kiba jia mynta khamtam haba don kiba ieit bathoiñ jongphi kiba sah sha kiwei pat ki ri. Nangta, ka plielad ruh ïa ki ïew ki hat lyngba ki advertisement bad rynsan jong kane ka atiar kum ka Facebook, Istagram, Watsapp ka ban ïarap ïa ki jingkiew jinghiar jong ki dor ki mur haa Ïew ha hat.
Nangta, haba phai pat sha ka liang jong ka jingnang jingstad, ka ïarap ïa ki khynnah pule ban ïoh jingtip shaphang kano kano ka bynta ba ki kwah, kum ka jingïapathai kylliang ïa ka jingtip, ki jingai jinghikai (tutorials) bad kiwei pat ki Course na ka bynta ka profession jong ki. Ka Ïarap ruh kumno ban thaw ïa ka kynhun ban ïa khana hapdeng ka imlang sahlang,kumno ban ïoh jingkyrshan ha ka por ba donkam.
Nangta, ka ïarap ïa ki samla kumno ban wad jingtip shaphang ki kam ki jam (employment) bad kumjuh ruh ban ïoh ïa kino kino ki Tamasa kum ka Tem ka put, ka rwai ka siaw, ki film, ki drama ki Skit bad kumta ter ter. Ngi lah ruh da kaba suk ban order ïa ki tiar kiba ngi kwah Online khlem da donkam ban pynshitom ban leit sha dukan. Ki Company ki wad ïa ka jingsngew (feedback) jong ki paidbah halor ka service ba ki ai, la ka biang ne ka dangduna. Ki Social media ka lah ruh ban pynmih fund bad wat ban batai shaphang ka jinglong jingman jong ka dheng kali (web traffic).
Hynrei ki jingduhnong ne ki jingsniew ba mih na ki Social media ki long : Ba ïa ki jingtip ba shimet jong ngi (personal information) ruh kiwei ki lah ban ïoh da kaba ki lehtuh. Kine ki lad pathai khubor ki ai ruh ïa ki khubor hamsaïa kiba lah ban ïalam bakla ïa ki briew lyngba ka jingklumar jingmut ,ki khubor thok, kaba lah ban ktah ïa ka jingsngew jong ki briew.
Ki mih ki Cyber crime dei namar ba kito kiba la tbit hapoh cyber ki lah ban thok ban shukor ïano ïano kum ka jingthok peisa (Scammers) kiba lah ban ktah ïa ki nongshah thok. Nangta, ka jingktah jong kane ka Media ka long ba phim sngewthuh ba ka ktah ïa ka por bad ka bor jong phi, kum ki samla kiba mlien ban ïalehkai games kum ka Pug-G bad kiwei kat haduh ba kin da kyrni bad poi hospital syndon namar ba ki thied (nerves) jong ki khynñiuh lynter kat haduh ba la kylla long kum u nongdih drugs, lada ym ïoh ban ktah te ym long.
Shuh shuh ka jingktah jong ka Social Media ka long ba nalor ba kim ai ïa ki khubor ba thikna, don ki Youtubers kiba shu tuh ïa ki khubor kiba la slem (stale) jong kiwei ki ri ban pynmih tang ban ïoh khring ïa ki local viewers. Nalor nangta, dei tang iwei bad ar ki Social Media Youtubers kiba khang khyrdep ïa ki jaka comments jong ki paidbah. Hynrei bunsien ki comment jong ki briew ka ktah wat ïa ka longrynieng jong uno uno uba shah comments kat haduh ban da poi Ïinglieh Ïingsaw ruh namar ki pyndonkam ruh da ki kyntien third class suda.
Haba phai pat sha ki print media, ka dei kaba ong u Chief Minister, Conrad K Sangma ha 1 st Meghalaya Media Meet ha Shillong myn sngi Thohdieng 20.09.24, ba dangdonkam shibun ban ai training ïa ki nongthohkhubor bad ki reporters. Ka daw ka long ba ngi shem ba tang na rukom ai heading ne title ïa kano kano ka news ka la ktah bha ïa ka imlang sahlang. Kane ka jia khamtam haba don kino kino ki jingïalang paidbah jong ki sengbhalang, kiba kren shongshit khlem nongrim wat ban byrngem byrsit ia ka sorkar ne ïano ïano, kaba lah ban ktah wat ïa ka jingsngew-ïapher jaidbynriew bad kumta ter ter, pyllait la ka pyllait khlem censor khyndiat ruh.
Namar don ki Editor lehse kiba pyrkhat da kaba ki ai Headlines da ka klang kan kham ïaid ïew ka Kotkhubor jong ki, don pat kiba ai headline da kawei, ka khubor hapoh ka long da kumwei. Kane kan pynjlep bad pynngiah ïa ki nongpule hadien habud. Ha ka jingshisha, u nongthoh ryngkat bad kiwei, la ïohlad ban ïatai sani bha ïa kane ka mat ryngkat bad i DC barim Kong Isawanda Laloo ha kamra treikam jong i, ha kaba i ïathuh ba ki don ki kyndon ban pynshitom ïa kum kita ki reporters. Hynrei, ki ïai mih na ka por sha ka por, mano keiñ ban teh shakuriaw ïa ka miaw ?. Ka press fraternity ka dei ban burom ruh ïa kiba bun ki riewdonburom ha ka society.