Lada urlong ka LCS ha EJHD kan ïarap ha ka khaïi ka pateng bad ki ri ba na bar
- Kyntu ka EJMSEIA ïa u Myntri ban buddien na ka sorkar pdeng halor ka LCS -
Khliehriat, Jymmang 2: Ki nongïalam bad ki dkhot jong ka East Jaiñtia Mineral Supplier Exporter Importer Association (EJMSEIA) ba kynthup u President, u bah Wanshwa Nongtdu, u Secretary, u bah Haral Dkhar bad u Treasurer, u bah Denis Siangshai, hynnin ka sngi ki la leit ban ïakynduh ia u myntri ka sorkar jylla uba dei peit ia ka Revenue bad Disaster Management, u bah Kyrmen Shylla bad ki la kyntu ïa u ba un sngewbha ban bud dien lem na ka sorkar pdeng ha kaba ïadei bad ka Land Custom Station ba la thmu ban buh hapoh East Jaiñtia Hills District, halor kane ka Association ka la buh ruh da ka jingthoh hakhmat utei u myntri sorkar.
Katkum ka shithi ba la soi da u Secretary jong ka EJMSEIA, u bah Haral Dkhar, ka Association ka la pynpaw ba na ka liang ka sorkar India, naduh ka 10 tarik u bnai jylliew 2001 ka la dep ai ka jingtyrwa (proposed), ban buh ïa ka Land Custom Station ha East Jaiñtia Hills District, kata ha shnong Umkiang lane ha Kuliang, te ha kaba ïadei bad kane ka East Jaiñtia Mineral Supplier Exporter Importer Association ka mih shakhmat bad bud ka jingkyrpad ïa u bah Kyrmen Shylla, uba dei u myntri jong ka tnat Revenue jong ka sorkar jylla ba un sngewbha ban buddien lem halor kane ka kam kaba la shu sahteng mynta la bun bun tylli ki snem, khnang ba kan long ka jingmyntoi ïa ki paidbah khamtam ïa ki paidbah jong ka district ha kaba ïadei bad ki kam khaïi pateng.
Na ka liang u President, u bah Wanshwa Suting, u la ong ruh ba lada kane ka Land Custom Station kan urlong hapoh ka district, kan ïarap shikatdei eh ban kyntiew ruh ïa ka ïoh ka kot jong ki paidbah ka thain kumjuh ruh ïa kito kiba dei ki nongkhaïi kiba don ka jingangnud ban leh ïa ka khaïi ka pateng bad kiwei pat ki ri ba marjan kum ak ri Bangladesh, namar kumba baroh hi ki tip ba ka East Jaiñtia Hills District ka long kaba riewspah ha ka jingdon ki mar poh kyndew kum u dewiong, u mawshum bad kumjuh ruh kiwei kiwei ki jait mar, kum u u maw, u shyiap, te lada lah ban pyntreikam noh kham kloi ïa katei ka Land Custom Station kan kham pynsuk bad kan kham ïarap ïa ki nongkhaïi bad ha kajuh ka por kan ïarap ruh ban kyntiew ïa ka ïoh ka kot jong ki paidbah.