Lada phim don jingsngewpher jaidbynriew kyrshan ïa ka jingdawa ba ka Tura kan dei ka nongbah Tlang: ACHIK
Ai kyrwoh sha ka VPP ba kam ba kan ïeng na bynta ka jylla baroh kawei
Shillong, Lber 31: Ka Achik Conscious Holistically Integrated Krima (ACHIK) ha ka sngi Thohdieng, ka la ai ïa u kyrwoh sha ka Voice of the People Party (VPP) lyngba ki lad pathai khubor ba ka dei ban kyrshan ïa ka jingdawa ba ka Tura kan dei ka nongbah Tlang ha ka jylla (Winter Capital) bad ban rah ïa kane ka mat ha Assembly.
Ha ka kyrwoh sha ki lad pathai khubor ka u Vice President ka ACHIK u Greneth M Sangma u la ong ba ka VPP ka dei ruh ban kyrshan ïa ka jingdawa ban rah ïa ka Additional Secretariat bad ki ophis ba hakhlieh duh (head office) jong tnat treikam ka sorkar jylla ban rah sha Ri-lum Garo nalor ban pynlong ïa ka Tura kum ka Nongbah Tlang ka jylla.
“Lada ka VPP ka shim shisha ïa kane ka sienjam kan dei ka sakhi ba skhem ba ka VPP kam dei ka party ba don ïa ka mynsiem jong ka jingsngewpher jaidbynrriew, hynrei kaba kwah ïa ka jingshongsuk bad ïa ka bha ka miat jong baroh ki jaidbynriew ha ka Jylla” ong u Greneth M Sangma.
Kane ka jingkynthoh jong ka ACHIK ka long hadien ba ka VPP ka la kam ba ka dei ka party kaba ïeng na bynta ka bha ka miat jong baroh ki nongshong shnong ka jylla khlem da pynïapher jaidbynriew hapdeng u Khasi bad Garo.
“Ka jingkyntu ka ACHIK ka dei kaba kongsan namar ka kren halor ka jingkongsan ka jingshongsuk hapdeng ki jaidbynriew ha ka sain hima sima. Ha ka Ri ba ïar kum ka India, kaba ki briew na ki niam bapher bapher bad ki jaidbynriew bapher bapher ki ïa imlang, ka long kaba kongsan ban don ïa ki Nongïalam kiba don jingmut shisha na ka bynta ka bha ka miat jong baroh ki jaidbynriew ha ka imlang sahlang” ula ong.
“Ka ACHIK ka kyrpad ïa ka Winter Capital ha Tura bad ka jingpynkynriah ïa ka Additional Secretariat bad ophis ba hakhlieh duh (head office) jong tnat treikam ka sorkar jylla ban rah sha Ri-lum Garo bad lada ka VPP ka kyrshan ïa kane bad ka ka rah ruh ha Assembly ban ïakren ïa kane ka mat kan pynshisha da ki kam ym tang ka jingkren pynlait jynhaw na ka shyntur,” u la bynrap.
U la ong ba namar lada rah ïa ka Winter Capital bad ka Additional Secretariat sha Ri-lum Garo kan wanrah ruh ka roi ka par sha kine ki thaiñ kiba dang donkam bunbah ki kam pynroi.