Ba pynlong ïa ka Raising Day ka NEPPCO ha ka sngi u Blei leit kynduh ka HNYF ïa ki heh nongpynïaid

Shillong, Lber 31: Ka Hynñiewtrep national Youth Front (HNYF) East Khasi Hills ha ka sngi Thohdieng ka la leit ban ïakynduh bad u General Manager jong ka NEPPCO ba dei peit ïa ka Human Resource ha kaba ïadei ba ka jingthmu jong kane ka tnat pynmih bording ka sorkar India ban pynlong ïa ka jingrakhe ïa ka Raising Day ha ka sngi u Blei khnang ba ki nongtrei ba dei Khristan jong kane ka corporation kin ym shah pynbor ban wan shim bynta ha kane ka jingrakhe.
Haba kren sha ki lad pathai khubor u General Secretary ka HNYF East Khasi Hills u Bah Tyllibor Swer u la ïathuh ba hadien ka jingïakynduh bad u Genral Manager u la ïathuh ba namar kane ka sngi ka dei ka sngi u Blei na ka liang ka corporation kam shym la pynbor ïa ki nongtrei ban wan shim bynta sha kane ka jibgrakhe hynrei ka ai mon laitluid ïa kiba don ka mon ban wan shim bynta.
U la ïathuh ruh ba namar kane ka sngi rakhe ïa ka jingsdang ka NEPPCO la ju leh ha man ka 2 tarik u Ïaiong u General Manager u la ïathuh ba kam dei ka jingleh khnang ka NEPPCO ban pynmong ïa ka jingsngew ki riewngeit Khristan hynrei ka ba la ju leh man u snem ha ka 2 tarik u Ïaiong bad namar mynta u snem ka dei ka sngi u Blei na ka liang ka Corporation kam pynbor eiei ïa ki nongtrei ban wan shim bynta beit la ïathuh u Bah Tyllibor.