Hapoh u Jylliew yn pyndep maramot ïa ka Jowai Bypass pyntip ka Sorkar ha ïingbishar

Shillong, Lber 31 : Ka Sorkar kala pyntip hapoh ka ïing Bishar High Court jongka jylla , ba ka jingmaramot ïa ka surok Jowai bypass yn pyndep noh hapoh u bnai Jylliew mynta u snem.
Ka Sorkar kala pyntip ïa kane hakhmat ka ïing Bishar kaba shong bishar ïa ka mukotduma bala mudui da u Bah Kynjaimon Amse.
U Additional Advocate General ula pyntip ba u Contractor, uba la ieh noh shipor ïa ka kam hadien ka jingbym ïamynjur ia ka jingpan pynjlan ia ka jaka trei hynrei mynta ula wanphai bad la ai biang ïa ka work order ba un maramot ïa ka bypass naduh Thadlaskein haduh Mihmyntdu, kaba la buh ban pyndep hapoh u bnai Jylliew, 2023.
Ka ïing Bishar kala bthah ba kane ka kam kan wan biang sha ka jingshong bishar ha ka taiew ba nyngkong jong u bnai Jylliew ban ïoh jingtip ïa ka jingïaid jong ka kam.
La pyntip na ka bynta ka National Highway Authority of India (NHAI) ba ka shi lynter ba sah jong ka surok hapdeng ka Jowai bad Ratacherra lah dep ban maramot mynta. Ka Jowai bypass ka dei kaba la khmih da ka Tnad PWD(Road) ka Jylla.
Ka Iing Bishar kala buh ban bishar biang ia kane ka kam ha ka 5 tarik u Jylliew, 2023.