Ngam pat donhok ban ïoh jingpynkup burom hynrei ka dei ka por ba ngan trei na bynta u paidbah: Heavingstone

Shillong, Lber 31: U MLA ba dang shu shah jied na Mawryngkneng Constituency u Bah Heavingstone Kharpran haba ai jingkren ha ka jingpynkup burom da ka Dorbar Shnong Sohryngkham Pyllun ha ryngkat ka jingïatreilang bad ka VPP Sohryngkham kaba la pynlong ha ka sngi Balang, u la ong ba ha ka jingshisha kam pat dei satia ïa u ban shah pynkup burom hynrei namar ba u dang shu jop namar kiba bun ki kam kiba u angnud um pat lah ban pynurlong.
“Ka jingjied ki paidbah ïa nga kum u kyrtong ka VPP da ka jingied khlem khmih lynti nongkylliang eiei ka la dei ka ram kaba ngan hap siew da ki kam ha kine ki san snem da kaba pyndonkam hok ïa ka bor bad ka iktiar ba u paidbah u pynkup,” ong u Bah Heavingstone.
U la ong ruh ba ha ka jingshisha na ka liang jong u kum u MLA hadien ba u la jop u la leit biang sha u paidbah ka Mawryngkneng uba la ibit ban phah sha ïing dorbar thaw aiñ ba ai khublei, “hynrei ban ïoh ka jingpynkup burom ka long kaba ngam pat khmih lynti namar ym pat don kawei ruh ka kam kaba nga la lah ban pynurlong noh hynrei nga kular ba ha kine ki san snem kiban wan ngan pyrshang ban ai ïa kaba bhatam ban ai ka jingshakri hok ïa u paidbah,” ong u Bah Heavingstone.
Ha kane ka sngi ba la pynkupburom ïa u Bah Heavingstone la wan ban sakhi lang da u Syiem khynnah ka Hima Khyrim u Paiem Habapan Syiem, u Sordar ka Sohryngkham, ki nongïalam ki niam bad ki balang bad kiwei kiwei ki riew rangbah nalor ki paidbah kiba la wan sakhi lang ha kane ka sngi.