Lada phi ieit jaidbynriew sei ïa ka Blue Print ba phi la pynkhreh na ka bynta ka lawei jong ka jingkylla : Dy. CM

Shillong, Lber 20 : U President ka NPP bad Deputy Chief Minister (Dy.CM) ka jylla u bah Prestone Tynsong u la khyrwit da kaba tyngeh ïa ki nongïalam ka Voice of the People’s Party (VPP) khamtam ïa u President katei ka party u bah Ardent M Basaiawmoit halor ka jingkob ieit jaidbynriew da kaba u la ong lada phi ieit jaidbynriew sei ïa kata ka Blue Print kaba phi la pynkhreh ban wanrah kata ka jingkylla na ka bynta ka lawei bad pateng ban wan wat shu kren laplah tang na rynsan bad pynbiej bad pynthame ïa ki paidbah.
Haba ther halor kane ka jingkob ieit jaidbynriew jongki VPP u la ong “ Nga kwah ban ïohi ïa kata ka Blue Print kaba ki la pynkreh ban wanrah jingkylla lada dei shisha kumba ki kob ba ki kwah ïa ka lawei kaba phyrnai bad ki ieit ïa ka jaidbynriew namar lehse lada nga ïohi ïa kata ka blue print ïoh ka khring ïa nga ruh ban ïadon lang bad ki”.
U bah Prestone u la ong ko VPP wat pynlut por ban leit pynbiej bad pynthame ïa ki paidbah ha ka kyrteng jongkata ka jaidbynriew. U la ong “Lada u Bah Ardent Basaiawmoit u dei uta u nongïalam uba shisha bad uba ieit ïa ka jaidbynriew nga kwah ban tip phi la long MLA 11 snem pyni ïa nga kiei ki synniang kiba phi la leh na ka bynta ka jaidbynriew khnang ba ngin ngeit shisha ba phi ieit ïa ka jaidbynriew. Aiu phi leh ha ka por ba phi long CEM ha KHADC na ka bynta ka jaidbynriew”.
Nalor kane u bah Prestone u la pynkynmaw ruh ba u bah Ardent u President ka VPP u la ïalam ia ki paidbah ban tur sha Secretariat na ka bynta ka Building Byelaws ha ka por ba u Dr Mukul u long kum u Myntri Rangbah ka jylla hynrei kane ka jingpyrshah ka shu kut tang ha suiñ khlem poi shano shano ruh.
Ka jingkylli ka long mano ba shim khia ban pynbeit ïa kane ka kam kaba ïadei bad ka jingkyntur ka MUDA sha u pud u sam ka Sixth Schedule hato kam dei ha u snem 2018 ha ka por ba u bah Hamlet Dohling u bat ïa ka tnad Urban Affairs ba u la wanrah ïa kane ka mat hapoh ka Kynhun Myntri bad lah ban pynbeit ïa kane ka kam. Kumta nga kyntu bad kyrpad ïa ki paidbah ka Shillong Parliamentary Constitueny ba kin bishar bniah bad shim ïa ka rai kaba dei ym ban shu ngeit matlah ïa kaei kaba ki pynbiej pynthame khlem ki nongrim jongka jingshisha”.
Halor ka jingïai kynnoh ba ka sorkar MDA 1 bad 2 hapoh ka jingïalam ka NPP ka dei ka sorkar ba bamsap u bah Prestone u la ong “ Ngim sngew lyngngoh shuh ïa kine ki jingkynnoh ba khlem nongrim jong ki nongïalam ka VPP, tangba haba kynnoh sei bad ki jingshisha lane kiew sha ïing lieh ïing saw ne ujor sha ki bor ka aiñ. Ki jingshah kawang ktieh ka NPP ki long kiba la jur naduh ka por jongka Election MLA ha u 2023 la ka dei ha Garo Hills ne hangne ha Khasi bad Jaintia Hills ruh hynrei kynmaw ba na ka 19 ngut ki MLA ha u 2019 ka NPP ka la jop sha ka 26 ngut ha u 2023. Hato kane kam pynpaw shai ba ki jingkynnoh ïa ka NPP ki dei tang ki buit pynthame kiba khlem nongrim ha ka por election katba ki paidbah pat ki ïohi ba dei tang ka NPP kaba nud ban shim ïa ki rai kiba sahteng naduh ka kam pynkynriah ïa ki Harijan, ka jingpynbeit pud pynbeit sam, ki kam pynroi pynpar khamtam ki surok bad lynti syngkieng kiba thymmai bad kumta ter ter”.
“ Mynta lei lei ka VPP ka la shu lapmiet tang ban kynnoh beit ïa ka NPP kat ha ki jaka ba ki kren tangba ki nia jongki kim don nongrim namar ki dei ba ki nia ïew ki nia pynbiej bad pynthame ïa ki paidbah. Sa kawei nga kwah ba kylli ïa ka VPP lada ki ieit jaidbynriew hato ym dei ba phin sdang shwa na ki Constituency jongphi, lada ka long kumta nga kwah ban tip katno kilometre ka surok phi la shna ha ki 4 tylli ki constituency ba phi la jop, katno phi la tei hospital bad kiei ki kam babha ba phi la leh na ka bynta ki paidbah jong ki constituency jongphi ne na ka bynta ka jaidbynriew” ong u bah Prestone.
Shuh shuh u bah Prestone u la ther tyngeh ruh ïa u President ka VPP u bah Ardent Basaiawmoit uba la kynnoh bad tei pop ïa ki nongïalam niam, ïa ki bor synshar shnong, ki nongïalam seng bhalang bad ki nongïalam seng saiñ pyrthei ba ki la pheil bad ki la pynsniew ïa ka jaidbynriew da kaba u sngew ba dei tang ma u uba hok. Hato phi la long nongïalam seng bhalang, phi la long nongïalam seng saiñ pyrthei naduh ka HSPDP, UDP phi la long MLA mynta 11 snem aiu phi la leh na ka bynta ka ri bad ka jaidbynriew sngewbha pynshai lem ong u bah Prestone.
“ Nga la ïohi ha kawei ka interview jong une u President ka VPP uba la kynnoh ba baroh ki nongïalam ki la pheil bad ki dei ki nongpop bad nongpynjot jaidbynriew bad ka paw imat tang ma u uba hok uba ïalam ïa ka VPP. Nga sngewsih ba kane ka jingkren jongu ka la ktah jur ïa ki nongïalam niam kaba nga hi shimet nga sngew ba ym dei ban kynnoh ïaki nongïalam niam ne ïa kino kino ki nongïalam ruh. Kumta nga kyntu jur ïa ki paidbah ba kin ym ngop ha kum kine ki jait nongïalam ba nang tang ban kdew kti ïa ki kwei bad sngewhok ïalade namar kiba kum kine ki jingkynnoh kim wanrah ki jingmyntoi ïa ka lawei jongka jaidbynriew”. ong biang u bah Prestone.
U la pynkynmaw ruh ba ha ka por ba u bah Ardent u long nongïalam ha ka HSPDP u la kam ba ka dei ka party kaba la rim bad kaba ïaleh ban pynïoh ïa ka jylla ba pura bad ha ka por ba u don ha ka UDP ruh u ong ba ka dei ka seng riewlum kaba biang tam hynrei mynta pat ba u la mih na kitei ki party u kynnoh kylla ïaki bad u sngew ba dei tang ka VPP kaba biang. “ Kumta nga kyntu ïa ki paidbah ban kiar ïalade na kane ka umsaw kaba wantuid kyndit kyndit namar tang khyndiat por kan sa rngad noh” pynkut u bah Prestone.