Shillong, Lber, 20: Ka Khasi Students Union (KSU) ka la kren diaw mynsiem halor ka jingbym kitkhia ki Politishian kiba don ha ka bor ban pynïaid ïa ka synshar ka khaddar ban pyrshah ïa ka Citizenship (Amendment) Act, 2019 bad ïa ka Citizenship (Amendment) Rules, 2024 kaba ktah ïa ka jinglong kyrpang jong ki jaidbynriew rit paid ha kane ka jylla Meghalaya bad ha ka thaiñ Shatei Lammihngi jong ka ri India.
U General Secretary ka KSU samla Donald V. Thabah ha ka jingïakren ïakren bad ki lad pathai khubor ha ka sngi Balang u la ong, “kam don ka jingshimkhia jong ki briew kiba don ha ka bor ban pynïaid ïa ka synshar ka khaddar hynrei lada ngi peit ïa kiwei kiwei ki jaitbynreiw lada ka ïadei bad ki ishu jong ki jaidbynriew ki mih shakhmat. Ngi ïohi ba ki jaidbynriew Bodo ki ïakhih ban dawa ïa ka Bodo Territorial Council (BTC) bad ban dawa ban pynrung ka ktien Bodo ha ka Khyrnit Baphra, wat ki MP Bodo ruh ki la pynlong da ka jingïakhih hakhmat ka Parliament.”
“Ngi ïohi ïa ka jingkulmar khappud hapdeng ka jylla Mizoram bad ka jylla Assam, ki MLA jong ka Mizoram khlem da khein ïa ka Liang Synshar ne ka Liang Pyrshah ki hiar sha khappud hynrei lada don kino kino ki huri hura bad ki jingjia ha khappud, ki politishian jong ngi ki shu kut tang ha ka ktien, ki shu kren tang ha rynsan ïalap elekshon,” la kynthoh une u nongïalam ka KSU.
“Ngi ju ïohi ruh ba wat ha ki rynsan ïalap elekshon kim ju kren hynrei ki kren pynban ïa kaei kaei kaba ki shu ïakynthoh bad kren bein iwei ïa iwei. Kane ka long kum ka jingpang kaba ktah bha ïa ka jaidbynriew jong ngi namarba ki nongïalam jong ngi kim don ïa ka jingkhlieh bad ka jingïohi jngai ba kin leh eiei khnang ba ka jaidbynriew jong ngi kan ïai neh ha ka snap ba kyrpang jong ka, kaba ngi la long trai ha la ka jong ka khyndew ka shyiap la bun spah snem,” ong u samla Thabah.
“Ka KSU, namar ka jingbym shimkhia bad ka jingbym lah jong ki nongïalam bad ki nongmihkmat jong ka jylla, kam banse ban ïatreilang bad kiwei kiwei ki kynhun ban mih shakhmat ban ïaleh pateng la pateng bad ka KSU kan ïai ïakhun ban ïoh ïa ka jingdawa jong ka seng tad haduh ban da ïoh ïa ki jingdawa,” la pynpaw une u nongïalam ka KSU.
U la pynkynmaw ruh ba ka North East Students Organisation (NESO) ka la shong jingïalang naduh u 2019 bad pynlong ruh ïa ki jingpakhang shnong, ki jingthang tyngshop ban pyrshah ïa ka jingwanrah ka Sorkar India ban pynbeit thymmai ïa ka Citizenship (Amendment) Bill, 2019 bad ha une ujuh u snem ka NESO ka la ujor ha Ingbishar Supreme Court ban dawa ban dei ban pynduh pyndam noh ïa ka CAB.
“Ka don ka jingshong bishar shisien bad hynnin ka sngi ka la don biang hynrei ngi sngewkmen khyndiat ba ka Ingbishar Supreme Court ka la phiah noh ar bynta ïa ki 327 tylli ki jingujor, kata, ïa ki jingujor na ki jylla Rithor la ka jong ka jingujor na ka thaiñ Shatei Lammihngi la ka jong.
“Ngi hun ba ngi ïohi ïa ka jingbishar namarba ha ka por ba la wanrah ïa ka CAB ngi la sdang nyngkong eh na kane ka thaiñ Shatei Lammihngi ïa ka jingïakhih kaba jur bad ynda la mynjur ïa ka CAA, 2019 ka jingïakhih ka la pur sha Rithor,” la pynkynmaw shuh shuh u samla Thabah bad bynrap, “ngi ïohi ruh ba ïa ki jingïakhih ba la pynlong ha ka thaiñ Shatei Lammihngi ka duna bha ka jingpathai khubor na Rithor bad nabar ri katba ynda pynlong ki jingïakhih sha Rithor wat ki lad pathai khubor nabar ri ki shimkhia bha.”
Haba ïathuh ïa ka jingïapher ka jingdawa sha Rithor bad ka jingdawa ha ka thaiñ Shatei Lammihngi samla Thabah u la ong, “ka jingïakhih jong ki (sha Ri thor) ka ïapher na ka jingdawa jong ngi bad ka jingtip jong ki briew shaphang ka daw tynrai ka jingïakhih jong ngi ka jah noh bad ka pynlong ba yn ym don batip ba ngi sdang ma ngi bad ki peit beit tang sha Rithor. Ka jingïakhih sha Rithor ka long ba kane ka aiñ kam long Secular namarba ha ka aiñ ym shym la kynthup lang ïa kiba na ka niam Muslim kum kita kiba shah banbeiñ ha ka kyrteng ka niam kiba wan na ka ri Pakistan, Afghanistan bad Bangladesh.”
“Ki don ruh ha Rithor kiba la kylli balei ba ym shym la kynthup ïa ki phetwir Tamil na ka ri Sri Lanka bad kumta ter ter, hynrei ka jingïakhih ha ka thaiñ Shatei Lammihngi kam dei namar ka Niam hynrei ka long namarba ha ki jylla jong ka thaiñ thaiñ Shatei Lammihngi ki trai ri ki long kiba rit paidbah haduh katta katta. Ngi ki khasi ngi don tang tang kumba 15 lak bad ka NESO ha ka jingujor ha Supreme Court ka la dkew shai ba kane ka thaiñ ka la mad jingeh bha ïa ka jingshah thombor bad shah buhai shnong ha ki mynder bad dei na kata ka daw ba ka la dawa ban pyntreikam ïa ka Inner Line Permit (ILP),” la ong u nongïalam ka KSU.
“Lyngba ka jingwanrung kyrthep ki mynder ri bun ki bor synshar trai ri ki la duh noh ïa ka jingsynshar shnong. Ngi ïohi ba ka bor jong ki Dorbar Shnong ka la tlot haduh katta katta, ki don ruh ki jaka kiba teng teng la mihkhmat da ki bym dei ki riewlum. Kane ka jia sha Assam, bad ha Tripura bad ha ka thaiñ Shatei Lammihngi,” u la ong.
“Dei ban pynduh pyndam ïa ka CAA namar ngi don ïa ka khappud bad ka ri Bangladesh kaba jrong 4 hajar kilomitar tam ka dei kaba khappud basan ha ka jingjrong ha ka pyrthei. Ka jingheh paid ki briew ha Bangladesh ka poi haduh 16 klur bad tang ki Bangladeshi Hindu ki don haduh 1.6 klur. Ngi ki Khasi ngi don tang 15 lak ngut bad lada wan tang 20 lak ngut ban sah ha Meghalaya kaei ka ban jia ïa ngi? la buh jingkylli une u nongïalam ka KSU.
Kum ban shu pyntip, ka Ingbishar Supreme Court ka la bthah ïa ka Sorkar India ban ai jubab halor ki 327 tam ki jingjor na ka thaiñ Shatei Lammihngi bad na Ri Thor pyrshah ïa ka CAA bad buh sngi ruh ban shong bishar ïa kane ka kam ha ka 9 tarik , Ïaiong, 2024.
