Bun ki kaitor saiñ pyrthei kiba khroh vote, hynrei khatduh dei ki paidbah kiba shim jingkheiñ: Paul

Shillong, Lber 20: Ka seng United Democratic Party (UDP) ka la ong ba ki nongïalam saiñ pyrthei ne ki kaitor kiba donkti ha ka ban pyrshang ban khroh ïa ki jingkyrshan na ka bynta ki kyrtong ha kine ki por ilekshon ka la pynlong ïa ka party ban pynkhuid bad ban lap ïa kiba lah ban shaniah kumba jaw ka um na u filter.
“Lada pyrkhat ha kawei pat ka liang kane ka la ïarap ïa ngi ban pynlah ban pynkhuid ne filter bad peit lyngba ki jinglong jong bun ki briew kiba donkti bad shisien ba phi la don kaei kaei kum ka ilekshon sha Parliament bad ki briew ki kynriah liang hangta phin ïohi ïa ki rong ba shisha bad kane ka ïarap ïa ngi ban tip shisha ïa kino kiba lah ban shaniah bad kino kiba shu pynkylla rong tang da ka jingmut ban ïoh ki jingmyntoi shimet,” ong u Myntri ka Sorkar jylla u ba long ruh u working president ka UDP, u Bah Paul Lyngdoh haba kren sha ki lad pathai khubor.
Halor kane u la ong ba hadien ba u la ïohi ba ki la don ki nongïalam ka UDP na Nongpoh constituency kiba la pynlong jingïalang bad ka kyrtong ka NPP ka kong Ampareen Lyngdoh bad kiba la rung ruh sha ka NPP.
Da kaba kynthoh ba kane ka dei kaei kaei kaba ju long bad ka routine hapoh ki saiñ pyrthei u la ong, “Haba wan ki election bun ki kaitor saiñ pyrthei ki long kiba treikam bha bad kiba trei kam kham bha shuh shuh, kumta kam don kaei kaei kaba sngewphylla hynrei ha kaba kut ka sngi ki briew ki thep vote halor ka jingkheiñ lade bad ka jingpeit ïa ki jinglah bad ki kam jong u ne ka kyrtong bad ka seng kaba ki mih ban ïakhun ia ka ilekshon”.
“Kum kine ki kaitor saiñ pyrthei kim lah ban wanrah than ïa ka jingkylla bad kin ym lah ruh ban don ha kata ka kyrdan ban long pdeng ban ïashah ne ban pyrshah ïa u ne kano ka kyrtong,” u la bynrap.