Lada kim kwah ba ngin phah bor pulit sha Mawlai, ka sorkar ka burom ïa kata: Prestone

Shillong, Nailar 12: U Symbud Myntri Rangbah ka jylla u Bah Prestone Tyngsong ha ka sngi Thohdieng u la ong ba ka sorkar kan ym teh kyndon eiei halor ka jingthmu jong ka Sur Ka Bri U Hynñiewtrep ban pyndonburom ïa u Bah Cherishterfield Thangkhiew da ki jingpynher lama ïong bad kiwei rukom leh burom jong ki.
U la ong ba lada ki kwah ban leh ïa kano kano ka prokram kum ka jingkynmaw burom ïa u Bah Cherishterfield Thangkhiew, ka sorkar ruh ka burom ïa kata hynrei, u la kyrpad ba ka dei ban long kaba jai jai bad kaban ym ktah ïa ka shong suk shong saiñ.
U la ong ba ki lah ban leh katba ki sngew bit ban pyndonburom ïa u Bah Cherishterfield Thangkhiew hynrei u la ong ba kim dei ban wanrah ïa kano kano ka jingpynthud ïa ka shongsuk shongsaiñ ha shnong ha thaw.
Haba ïadei bad ka jingdawa jong ki ba ka sorkar kam dei ban phah pulit sha ki bynta ka Mawai naduh ka 12 haduh ka 15 tarik, u Bah Prestone u la ong ba lada ki nong Mawlai kim kwah ban ïohi ïa kino kino ki pulit ha katei ka sngi, ka sorkar kan burom ïa ka jingdawa jong ki, da kaba u la ong ba kim dei pat ban shim ïa ka aiñ ha la ka kti lane ban wanrah ïa ka jingkulmar kiban ktah ïa ka shongsuk shongsaiñ.
Shuh shuh na ka liang u Symbud Myntri Rangbah u la ong ba u lah dep ban kular sha ka Sur Ka Bri U Hynñiewtrep ba yn sa rah ïa kane ka kaiphot ha ka ïing dorbar thaw aiñ ha ka dorbar Synrai ha ka 9 taik Nailur.
Kum ban shu kdew hangne ba ka Sur Ka Bri U Hynñiewtrep ka la khot ïa ka jingleh burom ia u Bah Cheristerfield da kaba kan leit buh syntiew ha u lum jyntep ha ka 13 tarik bad bud sa ka jingpynher lama ïong ha Mawlai Stand Bus, Mawdatbaki ban pyrshah ïa ka jingbym pynlait paidbah shuh ka sorkar ïa ka kaiphot jong ka kynhun tohkit halor ka jingshah siat ïap u Bah Cheristerfield.