Shillong, Nailar 12 : Ryngkat bad ki 151 ngut ki Pulit Ophisar na kylleng ki jylla ka ri India, ki ophisar na ki tnad tohkit bad syntiat jongka ri, u DSP jongka jylla u bah Pyrkhatlang Suchiang u la ïoh ïa ka khusnam Union Home Minister’s Medal for Ecellence in Investigaton na ka bynta u snem 2022.
ïa kane ka khusnam la sdang naduh u snem 2018 bad ka jingthmu ka long ban pynshlur bad ai mynsiem ïa ki Pulit Ophiar bad ki Ophisar jong kiwei kiwei ki tnad treikam ka ri kum ka CBI, NCB, NIA ba kin dang trei shitom shuh shuh ha ka kam jongki khamtam ha ka jingtohkit ïa ki kam runar bad ki kam bamsap.
Napdeng kine ki 151 ngut kiba ioh pdiang ïa kane ka khusnam mynta u snem 15 ngut ki dei na ka CBI, 11 ngut na ki pulit ka Maharashtra, 10 ngut na ki pulit ka Madhya Pradesh, Uttar Pradesh, 8 ngut na kawei kawei ka jylla Kerala, Rajasthan, West Bengall bad kiba sah ki dei na kiwei kiwei ki jylla bad ki Union Territory. Ki don ruh 28 ngut ki Pulit Ophisar kynthei kiba ïoh pdiang ïa kane ka khusnam.
