Lada ki khyrdop talasi mynder kim ïeng, ka MRSSA kan long kum ka ja khaw-ot: Lambok Marngar

Shillong, Naiwieng, 09: U President ka Khasi Students Union (KSU) u samla Lambokstarwell Mangar u la kynthoh da kaba ong, ba ka jingpyntreikam jong ka Sorkar Meghalaya Democratic Alliance (MDA) ba la ïalam da ka National Peoples Party (NPP) ïa ka ain Meghalaya Residents Safety and Security Act (MRSSA) tang ha ki hynñiew tylli shnong bad lada ka Sorkar kam shna ïa ki khyrdop talasi mynder, ka long thik kum ka ja kaba dang khaw-ot.
“Lada pyntreikam tang ha hynñiew tylli ki shnong ïa ka aiñ MRSSA bad lada ki khyrdop kim ieng nga sngew ba ka dei ka ain ja khawot bad kam pat long satia ka ain kaba pura,” la ong u President ka KSU haba ïakren bad ki lad pathai khubor ha ka sngi Palei.
Ha ka 30 tarik, Risaw, ka Sorkar Jylla ka la pynmih da ka jingbthah ban pyntreikam ïa ka Meghalaya Residents Safety and Security Act, 2016 da kaba bthah ïa ki trai ing bad ïa ki nongshong wai hapoh ki hynñiew tylli ki shnong hapoh ka Sor Shillong ba kin pynrung kyrteng ïalade ha ka wat kaba nyngkong. Ki hynñiew tylli ki shnong ki long ka shnong Nongrim Hills, Pohkseh, Nongrah, Nongmensong, Lapalang, Riat Laban bad Wahdienglieng
Ka jingpyntreikam ïa kane ka aiñ ka long ban khanglad ïa ki riew shimkabu bad ïa ki runar ban ïoh jaka rieh tngen hapoh ka jylla bad ban pyrkhing da ka aiñ na ka bynta ban khanglad ïa ka jingrung kyrthep be-aiñ bad ki nongbylla kiba wan trei be-aiñ kiba lah ban rung bad sah ha ki shnong bapher bapher.
“Ka MRSSA ka don ïa ka District Task Force ban khlieh da ki Deputy Commissioner bad yn kynthup ïa ki nongpynïaid shnong bad kumba ngi ïoh jingtip ba ki don ki nongpynïaid shnong kiba sngewdiaw ba ha ka jingtreikam ki (sorkar) la ïaid lait wat ïa ki Dorbar Shnong. Ïa ki shnong ba la pyntreikam ïa ka MRSSA ka dei ban kynthup lang ïa ki Rangbah Shnong,” u la ong.
Haba kynthoh ïa ka pynslem jong ka Sorkar Jylla kaba ai daw ba ka Inner Line Permit bad ka MRSSA ka dang don hapoh ka jingbishar jong ka Ministry of Home Affairs ka Sorkar Pdeng u Samla Lambokstar Marngar u la ong, “hynrei ka Sorkar ka la ïaid shakhmat da kaba phah sha u Lat bad ynda la buddien biang u Lat u la phah sha ka Sorkar India bad (ka Sorkar Jylla) la shu riehtngen ba ka Sorkar India ka dang bishar ïa ka Resolution jong ka ILP bad ka MRSSA.”
“Ngi sngew thamula bad ka pynpyrkhat ïa ngi ba lehse ka Sorkar kam don mon ban pynurlong ïa ki ishu kiba ngi dawa,” u la kynthoh.
“Lada ka sorkar ka long kaba shimkhia ïa kane ka kam bad katba ka Sorkar India ka dang pule sah ïa ka Resolution, ka Sorkar jylla ka ladei ban pyntreikam da la ka jong ka ain ba la don lypa da kaba pynieng noh ïa ki khyrdop ha ka wat kaba nyngkong ban pyni haduh katno ka jingseisoh haba pyntreikam ïa kane ka ain bad haduh katno ka lah ban bat ïa ki briew kiba wanrung sha ka jylla klem ki kot ki sla kiba biang,” la ong shuh shuh u President ka KSU.
“Ha ki khyndiat bnai ngi la ïai buddien ïa kane ka kam haba ngi la kynduh ïa u Symbud Myntri Rangbah ka Jylla (Bah Prestone Tynsong) u ong ba ka Sorkar India ka la pynphai ïa ka MRSSA sha ka Jylla bad ngi la shu ïohi tang ïa ka jingpyrshang ban pyntreikam ïa ka MRSSA ha ki katto katne ki shnong,” u la ong.
“Ka Sorkar Jylla ka ladep ithuh ïa ki jaka ban pynieng ïa ki 18 tylli ki khyrdop talasi mynder (Entry bad Exit Points) bad shipor ngi la khmihlynti ba ka Sorkar ka la shimkhia da kaba tei ïa ka khyrdop ha Umling, Ribhoi District hynrei kaba sngewsih ka long ba kane ka khyrdop talasi mynder ka kylla long pynban kum ka khyrdop talasi Covid bad mynta lei ka la shu kylla iing jah,” ula bynrap.
Halor ka jingpynbeit thymmai jong ka Sorkar ïa ka MRSSA, 2016, u Samla Lambokstarwell u la ong, “haba tang ïa ka aiñ phim pat pyntreikam kumno phin ïakren shaphang ka jingpynbeit thymmai. Pyntreikam shwa ïa ka ain bad phin sa ïohi hangno ka jingduna bad ka jingdkoh. Kano kano ka ain kan ym don kaba tang shu shna kan long noh kaba janai hynrei kan don beit ka jingduna.”
“Kumba ka long mynta, ka jinglaitlan jong ka khappud Meghalaya bad Bangladesh ka jur bha haduh katta katta. Phi kren ïa ka aiñ kam dei than tang ban shu tehlakam ïa ka jingwanrung kyrthep jong ki mynder. Hynrei kumba ka long, mynta ka jingma ïa ka jylla jong ngi ka dei u drok. Lada ki khyrdop talasi ki ieng, ngin sa ïohi ba yn sa lah ban tem ruh ïa ka jingrung kyrthep jong ki briew kiba nabar bad ïa ki kam runar ruser kiba pyrshang ban pynjot ïa ka jylla jong ngi baroh kawei,” la pynpaw u President ka KSU.
“Ka sorkar ka dei ban sngewthuh ba kane ka ain ka dei shi bynta ban ïakhun ïa ki mynder bad shibynta ka jingïakhun ïa ki kam kiba shyrkhei khamtam ïa u drok uba pynjot ïa ki khun samla hapoh kane ka jylla jong ngi,” u la ong.
Haba kylli, u President ka KSU u la ong, “da ïakren hok hi, ki khyrdop kiba ka Sorkar ka la pynieng ki long “Zero.” Ki 18 tylli ki khyrdop, kiba ka Sorkar ka kdew bad pynpaw ha ka ain bad thoh ruh ïa ka First, Second bad Third Phase ka long tang ha ka jingthoh katba ha ka jingshisha ka long “Nil.” Ka shu ieng thik tang kawei ha Umling bad kato mynta ruh ka la kylla iingjah bad sa 17 tylli kiba don ha Secretariat lano kin urlong ïa kata ngim tip bad shipor ka Sorkar ka ong ba la ïoh jaka bad ban leh sorbe kine kitai ban pynbeit ïa ka jingsiew bailutksan ïa ki trai jaka.
“Shipor ka Sorkar ka riehtngen beit ba ka MRSSA ka la don sha ka Sorkar India bad ngi dang ap ïa ka jubab na ka Sorkar India. Ynda kylli ïa ka Entry bad Exit point ruh ka kut tang kumta. Ban jubab kham bha ngin hap kylli ïa ka Sorkar,” ula ong.
U la ong ruh ba ka Sorkar ka kren kyllain bad ka Sorkar kam kwah imat ban peitngor ïa ki briew kiba nabar kiba wan rung sha ka jylla.
“Lada ka sorkar kaba don ha ka bor kam sngewthuh ïoh ba kan poi shisien ka sngi ba kita ki briew kiba dei tang ki nongwei ki dei hok ne kim dei ki nong India bad ki wanrung shapoh ka jylla jong ngi, kin ïoh sa ïa ki kot ki sla tuh nangne nangtai, ki shong shnong, ki trei bylla, ki ïoh sa ki kam ki jam bad kan sa poi ka sngi ba kin sa knieh wat ïa ka synshar ka khadar. Kijuh ki briew kiba ma ki (sorkar) ki pynsyiad, kijuh ki briew kiba shisien ka sngi kin sa kynjat ïa ka shuki kaba ki shong ma ki (sokrar) mynta bad kin sa long Myntri Rangbah da kita lada kim ïohi jngai,” la maham une u nongïalam ka KSU.