Khie im biang ka skul ba la 76 snem ha Thynroit, dei ka jingïatreilang, ong u Bah Harkin Warjri

Shillong, Naiwieng 09 : Ka Thynroit Government Lower Primary School dei ka skul kaba la seng ha u snem 1947 bad ha shwa u snem 2018 ym shym la don shuh wat tang u wei u khynnah skul kumjuh ki nonghikai ruh hynrei mynta ka la khie im biang da ka jingïatreilang naduh ka Dorbar Shnong Thynroit, ka School Managing Committee, ki nonghikai lem ki kmie ki kpa, ki khynnah skul nalor u nongmihkhmat ka Mawkynrew Constituency, u Bah Banteidor Lyngdoh.
Ïa ka iing skul ba thymmai jong kane ka skul la plie ha u snem 2022 lyngba ka jingshim khia u Bah Banteidor Lyngdoh uba la pynïoh mang tyngka na ka Sorkar Jylla kumba 37 lak eiei ban shna ïa ka ha u snem 2019-2020. La ïathuh ba ha shwa ban pynlong skul biang hadien ka jingwan poi thymmai ki nonghikai la shu kyntu ba kawei kawei ka longïing kan phah uwei ne kawei ka khun ban wan skul ha katei ka skul bad ha u snem 2018 la don tang 40 ngut ki khynnah.
Hynrei mynta kane ka skul ryngkat ka iing skul kaba thymmai ki la don palat 100 ngut ki khynnah skul naduh ki khynnah rit haduh ka Class V. “Ka la don ka por kaba ngi hap ban ïa synñiang pisa ban pynbha ïa ka skul ha ka por ba ngim pat ïoh ïa kane ka iing skul kaba paka na u MLA”, la ong u Bah Harkin Warjri, Sordar kane ka shnong uba dei ruh ha kajuh ka por u Chairman ka School Managing Committee.
U Bah Harkin u la ong ba ka dei ka jingïatreilang ba ka skul kan don pat ïa ka dur kaba kum ka skul ka dei ban don bad lada ym dei ka jingïatreilang ka la lah ban shu jah rngai ne shah pynduh noh ha ki bor Sorkar. Ha ka 09 tarik u Naiwieng, 2023, ka skul ka la pynlong ïa ka prokram ban rakhe ïa ka sngi burom jong ki kmie ki kpa ha kaba ki khynnah skul, ki nonghikai bad ki kmie ki kpa ki da leh kmen leh sngewbha da kaba ai ïa ki jingshad ki jingrwai nalor ki jingpyni riam na ki hep kiba rit.
Ha kane ka sngi la wan mih khmat kum ka kongsan ha ka jingïalang da ka Dr Amanda A Pakynteiñ, ka kurim u Bah Banteidor Lyngdoh, MLA ka Mawkynrew kaba dei ruh kawei na ki nonghikai ha kawei ka skul kaba shu hikai mon sngewbha ha nongbah Shillong bad kaba la ïoh khur bun ki khusnam na u synñiang jong ka ha ki kam hikai bad ki kam ban kyntiew ïa ka imlang sahlang.
Nalor ka Dr Amanda, la ïa donlang ruh da u Bah G Dhar, BDO ka Mawkynrew C&RD Block, ki riewrangbah ka thaiñ nalor kiwei pat. “Ka dei ka sngi ba kmen ba ka skul ka ïoh ïa kane ka sngi bad ki khynnah ki pyni ïa ki sap kiba kham pher kiba ngim kham ju ïohi ha kiwei ki bynta”, la ong ka Dr Amanda haba ai jingkren.
Kum ka nonghikai ka la ong ba ka ïohi ha nongbah Shillong ïa ki jingsniew ha kaba ki khynnah ki shah pynngop bad kumta ka kyntu ïa ki khynnah skul ban kiar na ki jingsniew bad dei ban kynmaw ïa ka jingtrei shitom ki kmie ki kpa.