Lada ka ym maramot kloi ïa ka surok NH-6, ha u Lber yn nym long ïaid kali shuh: KSU

Khliehriat Kyllalyngkot 19: Ka Khasi Students Union Narpuh Circle, lyngba u Vice President, u samla rangbah Phanuel Tongper, ka seng ka pynpaw ka jingsngew bitar halor ka jingleh bym salia ka sorkar bad ka National Highway Authority of India ha kaba iadei bad ka jingjot jingjulor ka surok ha ka thaiñ Narpuh, kaba la buh jingeh bad buh jingma ïa ki paidbah kiba iaid lyngba na kane ka surok.
“Lada ïa kane ka surok ym maramot bad pynbha la tikna ba kat haduh u bnai lber jong une u snem kane ka surok kan nym long shuh ban iaid ki kali namar ka la jot bad julor shaba palat” ong utei u nongialam ka KSU na Narpuh, watla ka sorkar ka ju khot jingïalang man ka por ïa ki nongsynshar shnong jong ka thaiñ, hynrei ka seng ka sngewthuh ba ki nongpyniaid bad nongsynshar shnong jong ka thaiñ Narpuh ki long kiba stad bad kiba shemphang ha kaba ka sorkar kan nym lah ban pynngop ïa ki ha kaba ïadei bad kane ka jingkwah ka NHAI ban plie biang ïa ka Toll gate.
Ka seng ka ong ba ha kaba iadei abd ka jingkwah bad jing angnud ka NHAI ban ioh plie noh ïa ka jaka lum pisa, ka Toll Gate Plaza kaba don ha Lumshnong ka long ka bym lah satia ban pdiang, ka sorkar bad ka NHAI da lei lei kan nym lah ruh ban pynbiej bad pynngop ïa ki nongsynshar shnong bad ki paidbah ka thaiñ Narpuh.
Ki nongïalam bad ki dkhot jong ka seng man ka por ki ju sakhi ïa ka jingdheng kali kaba jur ha ka thaiñ, bun ki kali ki sniew shiteng lynti, bun ki kali ki kylla khongpong ruh ha surok kane baroh ka dei na ka daw ka jingjot jingjulor palat ka surok, ki paidbah kiba shong kali bad kiba ïaid lynti ki mad jingeh ym tang ha ka iaid ka ieng hynrei ki mad jingeh ruh na ka daw ba jur palat ka khyndew pum pum, kaba buh jingma ruh ïa ka koit ka khiah jong ki paidbah, khamtam kito kiba shong ïing bad shong dukan ha rud surok ki hap ban mad ïa ka khyndew pum pum kaba mih na ka jingsniew palat ka surok kaba la i ruh kum ka surok khyndew ne surok khlaw, don ruh ki bynta jong ka surok kiba dap tang da ki thliew ki syar kiba buh jingeh bad buh jingma ïa ki kali kiba iaid khamtam ki kali heh kiba kit jingkit.