Tura, K’lyngkot 19: Tang ha ka rta kaba 21 snem ka samla Phyrnai Kyndait, na East Jaintia Hills bad kaba dang pule ha ka 4th semester Bachelor of Arts, ka la tyngshaiñ ha ka jingïalehkai ñiah saikil ha ka 5th Meghalaya Games ha Tura.
Ka jingieid jong ka samla Phyrnai ban ñiah saikil ka la paw naduh ba ka dang rit ha ki por ba ka dang ñiah tang da i saikil lai shaka bad nangne ka la kiew ha ka jingïalehkai. Ha u snem 2022, ka la ïoh ïa ka lad ban ïakhun nyngkong eh ha kawei ka lympung ba la pynïaid da ka West Jaintia Adventure Cycling Association ha Jowai.
Ha kane ka lympung, ka la ïoh khur ïa ka jingjop bad ka la lah ruh ban poi ha ka thong ñiah saikil na Jowai shaduh Amlarem bad kam sangeh tang hangne hynrei ka la kiew ruh ha ki kyrdan ba shajrong wat ha Mawkyrwat ba la pynïaid da ka Meghalaya Cycling Association.
Ka la ïoh ban mihkhmat ruh ïa ka jylla Meghalaya ha ka jingïakop jong ka MTB Tawang National CFI kaba la pynlong ha Tawang, bad hangne ka la ïoh khur ïa ka takma ksiar. Ka jingïaid lynti jong ka samla Phyrnai Kyndait na ka nongñiah saikil ba paw tang ha shnong, da ka jingtrei shitom ka la long ruh ka nongñiah saikil wat ha satlak ka pyrthei.
Ha u snem ba ladep, ka la ïakhun ha ka 4th Meghalaya Games bad ka la jop ha ka kyrdan baar bad mynta u snem ha ka 5th Meghalaya Games, ka la ïoh syndon ban khur ïa ka takma ksiar ha ka jingïakhun jong ka XCO women open category/Mass start.
Ka samla Phyrnai ka la ai khublei ïa ki kmie ki kpa, ïa ki bahaiing hasem khamtam ïa u hynmen uba ju ai mynsiem ïa ka ha ka jingïaid lynti kum ka thei ïalehkai. U hynmen jong ka, uba dei ruh u nongñiah saikil u long u païa baskhem na ka bynta ka samla Phyrnai bad dei lyngba ka saikil u hynmen ka sa jop ïa ka thong.
Ka samla Phyrnai kam ju phaidien na ki jingeh bad jingjynjar bad haba ai jingkren ka la ong ba lada ka leit shabar ban ïakhun ha ki rynsan, ka ju kynduh ïa kiwei pat ki para nongïalehkai ba kham tbit bad lada ïa nujor, ki kham biang ki tiar ki tar ban ïa ki saikil ba na shane bad haba ka wan na ka longing kaba sngewrit, ka long ka jingeh ïa ki ban ïoh ïa ki saikil kiba biang ki tiar ki tar namar ki la kham rem.Khlem kano kano ka jingshah hikai, ka ju ïaid marwei ha ka jingim kum ka thei ïalehkai ñiah saikil bad ka ju ñiah kai tang bad ki paralok bad manla ka step ka ju mareh step kumba 5-10 kilometer bad ka ju ñiah saikil manla ka step bad por janmiet kumba ar kynta eiei.
