Khliehriat, K’Lyngkot 28: Ha ryngkat lang ba ka ri India hi baroh kawei, ha East Jaiñtia Hills District ruh hynnin ka sngi, la rakhe ïa ka sngi Republic Day kaba 74 ha madan jong ka skul Khliehriat Higher Secondary School, u Deputy Commissioner, ka East Jaiñtia Hills District, u Abhilash Banarwal, IAS u la pynher ïa ka lama lai rong jong ka ri bad shim ruh ïa ka salute (Rashtriya Salute) jong ki khyndai tylli ki kynhun parade ba kynthup ka parade na ka tnat pulit EJHD, ka NCC, Bharat Scout and Guide bad ki khynnah skul na ki skul bapher bapher.
Hadien ka Parade ka bud sa ka jingpyni tableau ba la pynkhreh da ki tnat treikam bapher bapher kiba pyni ïa ki kam bad ki skim bapher bapher jong ki tnat sorkar, la pynitynnad shuh shuh ïa ka prokram da ki jingshad tynrai na ki khynnah skul bad ki khynnah college bad ka jingïalehkai skit ba la pynkhreh da ka ophis jong u Deputy Commissioner (Election).
Ha kane ka sngi u Deputy Commissioner u la sam ruh ïa ki syrnot bad momento sha ka District Social Welfare Officer, EJHD, ka kong R. Passah, u Supervisor, District Social Welfare Office, u bah Patrick. S. Dkhar bad sha ki nongtrei jong ka Multi- purposed Rehabilitation jong ka Wapung C&RD Block bad ka Saipung C&RD Block , na ka bynta ka jinglong la kloi jong ki kiba la ai ïa ka jingïatreilang bad jingkyrshan bor bah jong ki na ka bynta ban wad bad pynshisha ïa kito ki briew kiba don jingduna ha ki dkhot met kiba don hapoh ka district.
La sam ruh ïa ki prize sha kito kiba jop ha ka March Past ba kynthup ki khynnah jong ka JNV Girls, Rymbai bad ki khynnah jong ka Jaiñtia Eastern College, Khliehriat kiba jop ia ka cultural prokram bad ka tnat District Commerce and Industries Centre, East Jaiñtia Hills District, ka la jop ha ka jingpyni tableau.
Kum shibynta jong ka jingrakhe Republic Day, la sam ruh ïa ki jingai sngewbha sha ki khynnah jong ka Children’s Home (Boys and Girls), Thyndai Child Care Institute cum Counseling Centre, Tuber Kmai Shnong bad sha ki nongpang kiba thiah pang ha Khliehriat Civil Hospital bad la pynkut ïa ka prokram da ka jingialehkai (friendly match) ba la ïalehkai da ka Officer’s Club bad ki Waheh Shnong East Jaiñtia Hills District.
Kiba la ïa don ryngkat ha katei ka sngi, ki kynthup ruh u SDO (Sadar), Khliehriat, u Abhinav Kumar Singh, IAS, u Superintendent of Police, East Jaiñtia Hills District, u Jagpal Singh Dhanoa, IPS, ki Additional Deputy Commissioner, East Jaiñtia Hills District, u bah G.Warjri, MCS, u bah J. Shylla, MCS, u bah A. Nongbri, MCS, ka kong D. D. Syngai, MCS bad ki heh sorkar jong ka district.
