Da ki marbam sam ka tnad District Tuberculosis bad ka CSR-Star Cement sha kiba pang TB ha EJHD

0

Khliehriat, K’Lyngkot 28: Ka ophis jong ka District Tuberculosis Jaiñtia Hills ha ryngkat ka jingïatreilang bad ka tnat CSR jong ka company Star Cement Lumshnong, hynin ka sngi ka la sam ïa ki mar bam sha kito kiba don ïa ka jingpang Tuberculosis, kiba don ha East Jaiñtia Hills District, ïa ka prokram la pynlong ha phyllaw jong ka Khliehriat CHC bad ïa ki mar bam la noh syniang da ka tnat CSR jong ka Star Cement Lumshnong.
U DM&HO East Jaiñtia Hills District, u Dr. D.Shylla, u la ong ba ka tnat ka koit ka khiah ka don ïa ka thong ban ïakhun ban rat diengkhong ïa ka jingpang Tuberculosis (TB) kat haduh u snem 2025, u la khublei ïa ka District TB Office Jaiñtia Hills bad ïa ka tnat CSR jong ka Star Cement kiba la ai ïa ka jingkyrshan ïa kiba pang TB kiba don hapoh ka district, kumjuh ruh u la ai mynsiem bad pynshlur ïa kiba pang TB ba ki dei ban sumar bha, ban dih dawai tista ba kin dup koit kloi na ka jingpang.
La ong ruh ba ka district ka donkam ïa ki jingnoh syniang, kumta la kyntu ïa ki nongshong shnong ba kin mih sha khmat ban kyrshan lem ban noh syniang khnang ban dup lah ban pynurlong ban poi sha ka thong ban rat diengkhong ïa ka jingpang TB kat haduh u snem 2025.
Na ka bynta kito kiba kwah ban noh syniang ban long ki dkhot jong ka Nikshay Mitra lane ban kyrshan lem ïa kiba pang TB, lada dei ki briew shimet lane ki kynhun ki lah ban register kyrteng ha ka Nikshay Mitra portal, https://reports.nikshay.in/FormIO/DonorRegistration lane lah ban email ha ka, dtomgjnh@rntcp.org, lane ki lah ban leit kynduh ïa ki nongtrei jong ka tnat District TB Officer lane phone ha u number 9862889778.
Haba kren ha ka jingialang, ka District TB Officer Jaiñtia Hills, ka Dr E.V.B.Laloo ka la kyntu ïa ki nongpang TB ba ki dei ban shim khia ban dih dawai kumba la bthah da ki doctor, ki nurse bad ki ASHA khnang ba kin koit bad ban lait na ka jingsaphriang ka jingpang TB bad ka jingjyrhoh, ka jingpang shit, ka jing hiar ka jingkhia bad ka jingsyep ha ka por mynmiet ki dei ki dak ba paw jong ka jingpang TB, kumta ka kyntu ïa ki nongshong shnong ba lada ki don ïa kitei ki dak (symptom) ki dei ban leit phah check up bad phah sumar ha kino kino ki jaka ai jingsumar jong ka sorkar ha kaba kim donkam ban siew pisa, ka la iathuh ruh ba kane ka jingpang TB ka dei kaba lah ban sumar tang hapoh khyndiat bnai.
Ka la ai khublei ïa ka tnat CSR jong ka company Star Cement kaba la kloi ban ai ka jingïatreilang bad ka tnat, kaba la noh syniang da ki mar bam sha kiba pang TB bad sam ruh ïa ki borti ban pyndonkam ha ïing,
U Deputy Manager jong ka tnat CSR, Star Cement Lumshnong u Kingshok Borah, u la ïathuh ba na ka liang ka company ka la pynkhreh ïa ki mar bam bad ki tiar na ka bynta baroh kito ki nongpang TB kiba don hapoh East Jaiñtia Hills District bad ong ruh ba ka company ka long la kloi ban ai ka jingïatreilang ban dup lah ban rat diengkhong ïa kane ka jingpang TB , u la ong ba kine ki marbam ba la ai mynta ki dei na ka bynta lai bnai, kata haduh u bnai lber bad na ka bynta u bnai ïaïong haduh u bnai jylliew ka tnat CSR kan sa sam biang ïa ki mar bam, namar kane jingsam mar bam ka dei na ka bynta hynriew bnai kumba la ong da ka doctor, khnang ba ki nongpang kin ïoh ïa ki jingbam ban tei ïa ka met.
Ki mar bam ba la sam, ki kynthup 9 kilo u khaw, 3 kilo ka dud, ka umphniang bam, u dai, ka pylleng na ka bynta u/ka wei ka nongpang TB bad la sam ruh mar kawei ka borti.
Hakajuh ka por, u Kingshok Borah, u kyntu ïa ki nongpang TB ba ki dei ban sumar bha ïalade bad dih dawai tista kumba la bthah da ki doctor khnang ba kin dup koit kloi, u la ai ruh ka jingjitbok kitrwiang ïa baroh ki nongpang ba kin ïoh kloi ïa ka jingkoit jingkhiah.
Ka Pradhan Mantri TB Mukt Bharat Abhiyaan (PMTBMBA), ka dei ka campaign kaba thymmai ba la pyllait paidbah da ka President jong ka ri India ha ka 9 tarik u nailur 2022, ha kaba ki riew shimet, ki seng saiñ pyrthei, ki NGOs, ki Corporates ki lah ban mih sha khmat ban peit lem ïa ki nongpang TB na ka bynta hynriew bnai bad lada donkam haduh lai snem ban kyrshan ïa ki da ki jingbam kiba tei ïa ka met lane Diagnostic, Vocational training bad da kiwei kiwei ki bynta, kane ka skim kan lah ban wanrah ïa ka imlang ka sahlang kaba lait na ka jingpang TB.
La ïoh ïa ka jingkren maitphang na u Senior Treatment Supervisor, Khliehriat TU, u bah Linus Mannar bad ka jingkren na u Medical Health Officer Incharge Khliehriat CHC, u Dr Salsan Momin.

Leave A Reply

Your email address will not be published.