Khliehriat, K’ lyngkot 25: Ka ophis jong u District Election Officer, East Jaiñtia Hills District, mynta ka sngi ka la rakhe ïa ka sngi jong ki nongthep vote kaba ju tip kum ka National Voters Day kaba 14, ïa ka prokram la pynlong ha conference hall ha ophis u Deputy Commissioner ha Khliehriat
Haba kren ha ka prokram, u Deputy Commissioner, East Jaiñtia Hills District, u A. Baranwal, IAS u la kren shapang ki nongthep vote khamtam eh kito ki khynnah samla kiba la ioh ban thep vote, u la ong ruh ba ka jingthep vote ka dei kawei kaba pyni ïa ka jingsynshar paidbah bad ka dei ruh ka rynsan kaba baroh ki ioh bynta lang kumjuh solonsar, ha kajuh ka por, u la ai mynsiem bad pynshlur ïa ki nongthep vote kiba la kynjoh sha ka kyrta ba ki dei ban wanrah ïa ka jingkylla bad ruh ban wanrah ïa ka jingkiew ka jylla bad ka ri hi baroh kawei bad haba kren halor kane, utei u heh jong ka district u la ong ba baroh u/Ka wei pa uwei u nongshong shnong u don la ka bynta ha ka im lang ka sah lang da kaba thep ïa ka vote
U Additional Deputy Commissioner, East Jaiñtia Hills District, u bah G. Warjri, u la kren halor kane ka prokram kaba iadei bad ki nongthep vote bad pynshai ruh halor ka jingdonkam ban thep ïa ka vote bad ong ruh ba ka don ka jingthmu ban pynkupurom ïa ki nongthep vote kiba dang samla bad ka jingpynkupburom ïa kito ki nonghep vote kiba dang ioh thep vote nyngkong ba kin dup tip iala ka jong ka hok kum ki nongshong shnong jong ka ri bad kin dup tip ruh ba ka jingthep vote ka long kaba donkam bha .
La pule ïa ka jingkular lane ka pledge ba la ïalam da ka Additional Deputy Commissioner, ka kong J. U. Kharpuri.
Ha kane ka prokram la pynbna ruh ïa ki kyrteng jong ki Booth Level Officers (BLOs) kiba tbit bha, kiba dei jong ka 5-Sutnga-Saipung bad jong ka 6-khliehriat constituency bad la pynbna bad sam ruh ïa ki voter I.D lane ki EPIC sha kito ki nongthep vote kiba dng ioh ban thep vote nyngkomg.
La pynlong ruh ïa ka jingiamareh marathon kaba 11 Km da ka ophis jong u Deputy Commissioner, East Jaiñtia Hills District ha ryngkat ka jingïatreilang bad ka ophis u District Sports Officer, East Jaiñtia Hills District, ïa kane ka jingiakop mareh marathon la pynlong ha ka por mynstep ha kaba u ADC, u bah G.Warjri u la pyllait ïa ka lama marathon ha shwa ban sdang ka jingiamareh kaba naduh ka ophis barim jong u Deputy Commissioner shaduh sha PHC Rymbai bad phai biang sha DC ophis barim.
La sam ïa ki prize da ka pisa sha kiba jop ha kane ka jingïakop mareh ba la ïa shim bynta da ki khynthei bad shynrang.
Ha ka liang ki shynrang, uba la ioh ïa ka nam lahduh, u dei u samla Knerlang Phawa, na ka kynhun Graham’s Acadamy Tuber-kmaishnong, u Rishanmehi Ryngkhlem, u la ioh ba ar bad u samla Sting Phawa u la wan ba lai.
Ha ka liang ki kynthei pat, ka samla Rosy Sana ka la wan ba nyngkong, ka samla Wasaki Phawa ka la wan ba ar bad ka samla Rikynti Sana ka la wan ba lai.
