Shillong, Lber 28: Kumba long kiwei pat ki shnong ha ki thaiñ nongkyndong kiba don ha ka ri India, ka shnong Naronggre kaba dang hab ha Dalu C&RD block, kaba la shaniah tylli ha ki dieng ban shet jingshet. La ong ba kane ka shnong kaba don kumba 50 tylli ki longïing kam don ïa ka bording kaba dei ban ïoh.
Dei da ka jingtuklar bad ka jingsdang ban ai ka jingkyrshan na u Myntri Rangbah ka jylla u Conrad K. Sangma ba la pyntreikam ïa ka Global Himalayan Expedition (GHE), ha kaba ha kane ka shnong la sakhi ïa ka jingpyntreikam ïa ka bording na ka sngi bad ka jingwanlam ïa ka bording kaba nyngkong na ka sngi ba ki la ïoh ban pyndonkam ïa ki electrical pressure cooker.
U Myntri Rangbah u la leit ban jngoh ïa kane ka shnong bad u la plie ruh ïa kane ka project, da kaba pynbna ruh ba ka sorkar ka la ithuh ïa kine ki shnong kiba sha kyndong ha kylleng ka jylla ba kin pyntreikam ïa kane ka project, kaba kynthup ïa ka solar electrification, bad kaba kynthup ruh ïa ka jingwanrah ïa ka electrical pressure cooker ba la pyntreikam da ka bor jong ka sngi (EPC).
“Ka longkmie kaba hap ban ïaid da 2-3 kilometre manla ka sngi ban leit lum ïa ki dieng ban thang bad shet jingshet ha la ïing ha kaba kane ka jingleh ym tang ba ka wanrah ïa ka jingpom ïa ki dieng hynrei ka wanrah ruh ka jingma ïa ka ïing ka sem bad ka jingjaboh jong ka lyer. Nalor ka jingpom ïa ki dieng ban shet jingshet kiba bun ki longïing ki shaniah ruh ha ka umphniang sharak bad kane ka project ka la wanrah ka jingkmen ha ki shnong bad kane kan ïarap ruh ban pynduna ïa ka jingpyndonkam ïa ki diang ha kaba ïadei bad ki kam shet jingshet,” ïathuh u Myntri Rangbah ka jylla.
U Myntri Rangbah u la pyntip ruh ba ïa ka GHE la pyntreikam ha ka jylla, khamtam ha ki jaka ba sha kyndong jong ka Garo Hills ha kine ki 6 snem ba la leit, bad ki la don haduh 20,000 kiba ïoh myntoi kiba la ïoh ka jingïarap bad kiba la ïoh ïa ki solar light, ki solar computer lab ha ki skul, kaba kynthup ruh ïa ka jingwanrah ïa ki jaka shet kiba khuid.
Ha u snem ba la dep la wanrah ïa ka GHE na ka solar light kaba la shna ha Tura, kaba la plie ruh da u Myntri Rangbah ka jylla.
Ïa kane ka jingplie la shim bynta lang da u MLA ka Salmanpara u Ian Botham Sangma bad u MLA ka Dalu u Brenning Sangma.
Ki la don palat 26 tylli ki longïing haba 50, ki la ïoh ban pyntreikam ïa kane ka project, bad na ka liang u Myntri Rangbah u la pynthikna ba baroh ki longïing hapoh ki shnong kin ïoh ki jingïarap lyngba kane ka project.
